Elordada úzdik IT jobalar tanystyryldy
ASTANA. QazAqparat - Nazarbaev ortalyǵynda «Method PRO» baǵdarlamasynyń úzdik ІT-jobalary tanystyryldy, dep habarlaıdy QazAqparat tilshisi.
Osymen ekinshi jyl uıymdastyrylǵan jazǵy IT-baǵdarlama taǵylymdamasynda jastar ındýstrııanyń úzdik mamandarynan kásibı ІT-bilim alý múmkindigine ıe boldy. Ótken jyldyń nátıjesi boıynsha, stýdentter ázirlegen 4 joba óndiriske engizildi, jastar 3 mıllıon teńgeden astam tabys taýyp sonymen qatar iri ulttyq kompanııalarǵa jumysqa ornalasýǵa múmkindik aldy.
Bıylǵy «Method PRO» baǵdarlamasyna 15 memleketten 1000-nan astam ótinim kelip tústi. Konkýrstyq irikteýdiń nátıjesi boıynsha, maýsym-maýsymda Astana men Almaty qalalarynda 200 adam ІT-taǵylymdamadan ótti. Jobaǵa qatysýshy jastar oqý barysynda 2 topqa bólindi: baǵdarlama jáne zertteý jasaıtyn IT-top jáne marketıng, dızaın jáne menedjmentti zertteıtin Non-IT toby. Qatysýshylar mobıldi jáne veb-ázirleme, mashınalyq oqý jáne Vig Data, marketıng jáne bıznes-taldaý boıynsha praktıka jınady.
Sonyń nátıjesinde jas ázirleýshiler 8 mıllıon teńgeden astam tabys tapty jáne olarǵa iri otandyq kompanııalardan jumysqa ornalasý úshin 30 usynys kelip tústi.
«Álemde búgingi kúni osyndaı taǵylymdamanyń analogy joq. Keleshekte biz qatysýshylar men seriktes - kompanııalardyń geografııasyn keńeıtýdi josparlap otyrmyz. Elbasy qory árqashan daryndy jastarǵa qoldaý kórsetedi. Jastarymyz bizdiń baǵdarlamamyzdyń arqasynda ózderiniń potentsıalyn iske asyra alatynyna qýanyshtymyz», - dep atap ótti QR Tuńǵysh Prezıdenti - Elbasy Qorynyń atqarýshy dırektorynyń orynbasary Sultan Aıtjanov.
