Elordada úzdik áleýmettik jobalar boıynsha ótinimder qabyldaý bastaldy
ASTANA. Qazaqparat - Qazirgi ýaqytta aǵymdaǵy jyldyń qyrkúıek aıynda ótetin «Qazaqstanda iske asyrylatyn úzdik áleýmettik jobalar» respýblıkalyq kórmege qatysýǵa kez kelgen adam ótinim berip, óziniń áleýmettik jumysyn usyna alady.
Bul týraly astana.kz saıtyna Astana qalasynyń Jumyspen qamtý jáne áleýmettik baǵdarlamalar basqarmasynan habarlady.
Uıymdastyrýshylardyń talaby boıynsha, qarjylandyrý kózine qaramastan halyqty áleýmettik qorǵaý júıesi sheńberinde qyzmet atqaryp júrgen qoǵamdyq birlestikter, múgedekterdiń mekemeleri, basqa da mekemeler men vedomstvolar, jeke tulǵalar jáne úkimettik emes uıymdarmen júzege asyrylatyn áleýmettik jobalar atalǵan sharaǵa qatysa alady. Bul úshin jobany tirkep, ótinish joldaý kerek. Biraq bir jyldan artyq ýaqyttan beri iske asyrylyp jatqan, sondaı-aq áleýmettik mańyzdy jáne tájirıbede oń nátıjesi bar áleýmettik jobalar ǵana qaralady. Sonymen qatar, joba áleýmettik kómekpen jáne qoldaýmen ómirdiń qıyn jaǵdaıyna tap bolǵan halyqty qamtýy tıis.Komıssııa múshelerine usynylǵan úzdik joba kórmege qoıylady. Ótinimder qabyldaý Sh.Imanbaeva k-si 16 mekenjaıy boıynsha 12 qyrkúıekke deıin qabyldanady.
Eske salaıyq, kórme elordada ekinshi ret ótkizilmek. Uıymdastyrýshylar Astana turǵyndaryna elimizde júzege asyrylyp jatqan jobalar men olardyń múmkindigi shekteýli jandar úshin mańyzdylyǵy jaıly habardar etý maqsatynda sharany ótkizýdi dástúrge aınaldyrmaq.
Vedomstvo qyzmetkerleriniń atap ótýinshe, byltyr kórme ilki rejimde ótkizilgenimen jaqsy ıdeıalar men jobalar boldy. Ótken jyly sharaǵa kelýshilerdiń nazaryna «Múgedektigi bar adamdardy tarta otyryp aǵash, saz, kıiz, teri, tas, bıserden qoldan jasalǵan ımıdjilik kádesyılar shyǵarý» jobasy usynyldy. Onyń avtorlary - Dına Erdıldınova bastaǵan «DOS» táýelsiz ómir» múgedekter ortalyǵy qoǵamdyq birlestiginiń músheleri. Múmkindigi shekteýli jandardy jumyspen qamtý syndy basty mindetti kózdeıtindikten naq osy joba úzdik dep tanylǵan bolatyn.
