Elordada úısiz ıt-mysyqtarǵa qaraıtyn uıym ashyq konkýrs arqyly tańdalady
NUR-SULTAN. QazAqparat - Astanada qańǵybas mysyqtar men ıtterge arnalǵan jańa baspananyń jumysyn qamtamasyz etetin kompanııa ashyq konkýrs arqyly anyqtalady. Oǵan barlyq múddeli eriktiler jáne basqa da uıymdar qatysa alady, dep habarlaıdy QazAqparat.
Bul týraly qoǵamdyq uıymdarmen jáne volonterlik birlestiktermen kezdesý barysynda qalalyq orta sapasy jáne baqylaý basqarmasynyń basshysy Dáýlet Dosqulov málimdedi.
«Búginde biz janýarlarǵa janashyrlyq tanytyp júrgen belsendilermen tyǵyz baılanys ornatyp jatyrmyz. Olarmen janýarlar baspanasyn senimgerlik basqarýǵa berý máselesin talqyladyq. Ashyq konkýrs talqylaýlar men kelissózder, júıeli sharalar qabyldanǵannan keıin jarııalanady», - deıdi qalalyq orta sapasy jáne baqylaý basqarmasynyń basshysy Dáýlet Dosqulov.
Kezdesýde taraptar salada týyndaǵan aktýaldy máselelerdi eskere otyra, alda birlesip oryndalatyn birqatar is-sharalardy belgiledi.
«Biz jańa baspanany júrgizý men ondaǵy janýarlardy asyraýǵa arnalǵan joba ázirledik. Sheteldik jáne Qazaqstannyń ózge de qalalarynyń tájirıbesine súıene otyryp, saraptama jasadyq. Aldaǵy jarııalanatyn baıqaýǵa biz de qatysamyz» - deıdi NUCOBO janýarlardy qorǵaý qaýymdastyǵynyń jetekshisi Lılııa Sarsenova.
Kezdesý nátıjesi boıynsha aldaǵy ýaqytta memlekettik bıýdjettiń qatysýynsyz senimgerlik basqarý sharty sheńberinde jańa baspana jumysynyń tujyrymdamasy bekitilmek.
