Elordada úı órtenip, 3 bala qutqaryldy
NUR-SULTAN. QazAqparat - Nur-Sultan qalasynda turǵyn úıden órt shyǵyp, onyń turǵyndary órtten aman qaldy. Bul týraly Saryarqa aýdanynyń ákimi Erǵalı Egemberdi óziniń Feısbýk paraqshasynda jazdy, dep habarlaıdy QazAqparat.
«Búgin 12 sáýirde tańǵy saǵat 6-da Agroqalashyq turǵyn alabyndaǵy kezekshilik kezinde Saryarqa aýdany ákimdiginiń bas ınspektory Tórebekov Berik pen Kólik jáne jol-kólik ınfraqurylymyn damytý basqarmasynyń bas mamany Erǵanat Beksultanov Amanqaraǵaı kóshesi, 20 B mekenjaıyndaǵy turǵyn úıdiń órtenip jatqanyn kórdi. Olar kórshi úılerdiń turǵyndarymen birge atalǵan úıde turatyn 5 adamdy (onyń ishinde 3-eýi bala) qutqaryp, basqa jerge kóshirdi», - dep jazdy aýdan ákimi E.Egemberdi.
Tótenshe jaǵdaılar departamentiniń órt sóndirý qyzmetkerleriniń jedel áreket etýiniń arqasynda úıge japsarlas salynǵan úılerdegi órt sóndirildi.
Saryarqa aýdanynyń ákimi málim etkendeı oqıǵa ornyna jedel járdem brıgadasy keldi, sondaı-aq órt saldarynan zardap shekkender men qurban bolǵandar joq.
