Elordada úı kezeginde turǵandar men jumys isteıtin jastarǵa 2 myńǵa jýyq páter beriledi

ASTANA. KAZINFORM – Jyl sońyna deıin Astanada baspana kezeginde turǵan azamattar men jumys isteıtin jastarǵa 1856 páter beriledi.

Paıdalanýǵa beriletin kóppáterli eki turǵyn úıdiń jalpy aýdany 44,4 myń sharshy metrdi quraıdy, al páter sany – 806.

Astana qalasynyń qurylys basqarmasynyń málimetinshe, joba aıasynda kelesi jumystar aıaqtalady:

– E16, E32, E45, E24 kósheleri qıylysynda ornalasqan (jobalyq ataýy) kiriktirilgen úı-jaı men avtoturaǵy bar kóppáterli turǵyn úı kesheni. Qurylystyń ekinshi kezeńinde 658 páter qarastyrylǵan;

– E20, E32 jáne E33 kósheleri qıylysynda ornalasqan (jobalyq ataýy) avtoturaǵy bar kóppáterli turǵyn úı kesheni, onda 148 páter kiredi.

Sonymen qatar jumys isteıtin jastarǵa 1050 páter berilmek.

Ótken jyly Astana qalasynyń qurylys basqarmasy jumys isteıtin jastarǵa 1050 daıyn páter satyp alý boıynsha kelisimsharttar jasasty.

Astana ákimdiginiń Kazinform agenttiginiń suraýyna bergen jaýabyna sáıkes, páterlerdi tapsyrý jetkizýshilerden qabyldap alǵannan keıin bastalady, ıaǵnı shamamen 2025 jyldyń mamyr-qazan aılary aralyǵynda.

Atalǵan jyljymaıtyn múlik Astana qalasynyń turǵyn úı jáne turǵyn úı ınspektsııasy basqarmasynyń qaraýyna ótedi, al basqarma páterlerdi úmitkerler arasynda bólý jumystarymen aınalysady.

Resmı málimetterge sáıkes, búginde Astana qalasynyń kommýnaldyq turǵyn úı qorynyń esebinde 38 myńnan astam azamat baspana kezeginde tur.

Aıta ketsek, naýryzda ótken Úkimet otyrysynda vıtse-premer Serik Jumanǵarın bıyl elimizde rekordtyq kólemde turǵyn úı paıdalanýǵa beriletinin málimdegen edi.

Sondaı-aq elordada turǵyndardy páterge tirkeýge qoıýdyń jańa tártibi týraly jazǵan bolatynbyz.