Elordada ústel tennısinen «Astana Alau Cup - 2016» festıvali ótedi
ASTANA. QazAqparat - Qyrkúıektiń 3-4-i kúnderi «Alaý» muz saraıynda ústel tennısinen marafon ótedi. Jarysqa kásipqoılar da, nıet bildirgen jandar da qatysa alady. Bul úshin 2 qyrkúıekke deıin ótinim berý kerek.
Qala ákimdiginiń saıtynyń habarlaýynsha, týrnırde 21 jasqa deıingi ul-qyzdar, kásipqoılar men áýesqoılar, ardagerler (erler - 50 jas jáne odan joǵary, áıelder - 45 jas jáne odan joǵary), sondaı-aq, múmkindigi shekteýli sportshylar sheberlik baıqasady.
Jarys «mınýs eki» olımpıada nemese sheńber júıesimen ótkiziledi. Kelip túsken ótinishter boıynsha tóreshiler alqasy anyqtalady.
Jeńimpazdar men júldegerler dıplomdarmen, medaldarmen jáne baǵaly syılyqtarmen marapattalady.
Uıymdastyrýshylardyń atap ótýinshe, týrnır astanalyqtardyń arasynda ústel tennısin buqaralyq sport túri retinde dáripteýge, kásipqoılardyń sheberligin shyńdaýǵa jáne jalpy, qala halqyn sportpen aınalysýǵa tartýǵa yqpal etedi.
