Elordada úshinshi kópsalaly aýrýhana salý usynysyn qoldaý mańyzdy dep sanaımyn - Toqaev

ASTANA. QazAqparat – Astanada úshinshi kópsalaly aýrýhana salý usynysyn qoldaý mańyzdy dep sanaımyn. Elordany damytý máseleleri jónindegi keńeste Memleket basshysy Qasym-Jomart Toqaev osylaı málim etti, dep habarlaıdy QazAqparat tilshisi.

«Astanada halyq sanynyń baqylaýsyz ósýi qazirgi zamanǵy emhanalardyń, sapaly jáne qoljetimdi qyzmetteri bar mamandandyrylǵan medıtsınalyq mekemelerdiń tapshylyǵyna alyp keledi. Bilikti medıtsınalyq kadrlardyń tapshylyǵy baıqalady. Kóbine adamdar emhanalardaǵy kezek pen jeke klınıkalardaǵy qyzmetterdiń qymbat bolýyna baılanysty medıtsınalyq kómekke júginbeıdi. Munyń bári qala turǵyndarynyń densaýlyǵyna teris áser etedi. Jaǵdaıdy túzetý úshin elordada úshinshi kópsalaly aýrýhana salý usynysyn qoldaý mańyzdy dep sanaımyn», - dedi Prezıdent.

Sonymen qatar, Memleket basshysy Qasym-Jomart Toqaev turǵyndardyń qalalyq ınfraqurylymǵa tıisti deńgeıde qoljetimdiligin arttyrý máselesine erekshe toqtaldy.

«Elordada ómir súrý sapasyn turaqty negizde arttyrý qajet. Astananyń barlyq turǵyndary qalalyq ınfraqurylymǵa – bilim berý, densaýlyq saqtaý, mádenıet jáne sport obektilerine, sondaı-aq saıabaqtar men qoǵamdyq keńistikterge teń qoljetimdilikke ıe bolýy tıis. Bul barlyq azamattardyń ómiri úshin jaıly jáne qolaıly orta qurýdyń negizi», - dep málim etti Prezıdent.