Elordada úshinshi aınalma jol salynýy múmkin
Bul týraly «Astana Bas jospary» ǴZJI» JShS qalalyq kólik tobynyń bas mamany Aqmaral Temirova aıtty, dep habarlaıdy QazAqparat tilshisi.
«Qalamyz óziniń josparly sheshimine sáıkes, tıimdi-aınalma qurylymǵa ıe. ıAǵnı, birneshe aınalma bar. Birinshisi – K-1 úlken syrtqy aınalma joly. Ótken bas josparda biz ishki – kishi aınalma joldy usyndyq. Al bul josparda úlken jáne kishi aınalma joldardyń arasynda úshinshi aınalma jol salýdy usynyp otyrmyz», - dedi ol «Astana qalasynyń 2035 jylǵa deıingi bas josparynyń» jańa jobasy boıynsha qoǵamdyq talqylaý aıasynda QazAqparat tilshisine bergen suhbatynda.
Onyń naqtylaı túsýinshe, búginde K-1 de atalatyn úlken aınalma jol tolyq jumys istep tur. Al kishi aınalma joldyń 70 paıyzy paıdalanýǵa berilgen. Endi úshinshi aınalma jol salynbaq.
«Úlken aınalma jol bar. Kishi aınalma joldyń 70 paıyzy salyndy. Endi mine jańa bas josparda úshinshi aınalma joldy usynyp otyrmyz. Ol kenttengen aýmaq shekarasy arqyly ótedi. Bul qalaishilik tranızttik qozǵalysty qamtamasyz etý úshin jasalady. Qalaǵa kirmeı bir shetten ekinshi shetke barý úshin adamdar qazirgi ýaqytta negizinen K-1 úlken aınalma jolǵa shyǵady. Biraq, aınalma jolǵa shyqqanǵa deıin kóp ýaqyt joǵaltady. Sondyqtan kenttengen aýmaq shekarasynda úshinshi aınalma jol salýdy usynamyz. Bul aınalma jol Óndiristik aımaq arqyly ótip, qalanyń shyǵys, ońtústik bólikterin qamtyp, Telman eldi mekeninen Taldykól arqyly Ilınka, odan keıin Kóktalǵa deıin bolady». – dedi Aqmaral Temirova.