Elordada úsh jaqty negizde telemedıtsınalyq keńes ótti
ASTANA. 26 qazan. QazAqparat - «Búgin «Salamatty Qazaqstan» medıtsınalyq poıyzynyń dárigerleri bir ýaqytta «Ana men bala ulttyq ǵylymı ortalyǵy» jáne «Astana medıtsınalyq ýnıversıteti» aktsıonerlik qoǵamynyń mamandarymen birlesip, úsh jaqty negizde telemedıtsınalyq keńes ótkizdi»,
dep habarlaıdy Densaýlyq saqtaý mınıstrliginiń baspasóz qyzmeti.
Baspasóz málimetterine qaraǵanda, keńeske «Ana men bala ulttyq ǵylymı ortalyǵynan» tájirıbeli maman, medıtsına ǵylymdarynyń doktory, professor T.M.Úkibasova jáne «Astana medıtsınalyq ýnıversıtetinen» akýsherlik jáne gınekologııa kafedrasynyń meńgerýshisi, medıtsına ǵylymdarynyń doktory, professor G.Ý. Ahmedıanova qatysty.
Aqmola oblysy Adyr stansasynyń turǵynyn «Salamatty Qazaqstan» medıtsınalyq poıyzynyń dárigerleri keshendi túrde tekserip, aldyn ala dıagnoz qoıǵan. Búgin olar telemedıtsınanyń kómegimen professorlardyń kómegine júgindi. Júrgizilgen shara barysynda ǵalymdar emdeý tásili men is-sharalaryna qatysty ózderiniń keńesterin berdi. Jalpy búgingi tańda telemedıtsına elimizdiń barlyq óńirinde engizilýde. 2011 jyldyń 9 aıynda respýblıka boıynsha 12293 telemedıtsınalyq keńes ótkizildi (ótken jylǵy kórsetkish - 10284). Osy kezeń ishinde eń kóp telemedıtsınalyq keńes Qaraǵandy (6451), Atyraý (728) jáne Batys Qazaqstan (507) oblystarynda ótkizilgen.
Telemedıtsınalyq quraldarmen jabdyqtalǵan «Salamatty Qazaqstan» medıtsınalyq poıyzy Memleket basshysy N.Á.Nazarbaevtyń 2011 jyldyń 28 qańtarynda Qazaqstan halqyna arnaǵan «Bolashaqtyń irgesin birge qalaımyz» atty Joldaýynda aıtylǵan mindetterge saı júzege asyryldy. Joba «Qazaqstan Respýblıkasynyń densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» memlekettik baǵdarlamasyna saı kólik medıtsınasyn damytýdy qarastyrady.
