Elordada úsh kósheniń qıylysyndaǵy jol ýaqytsha jabylady
NUR-SULTAN. QazAqparat - Sý qubyry jelilerin ornatýǵa baılanysty qazan aıynyń 2-25 aralyǵynda qaladaǵy Aınakól - M.Tólebaev qıylysy jáne M.Tólebaev - R.Qoshqarbaev kósheleriniń qıylysyndaǵy jol ýaqytsha jabylady, dep habarlaıdy elorda ákimdiginiń resmı saıty.
Nur-Sultan qalasynyń kólik jáne jol-kólik ınfraqurylymyn damytý basqarmasy Ákimshilik polıtsııa basqarmasymen birlesip, «Astana qalasynyń turǵyn úı alaptarynda ınjenerlik jelilerdiń qurylysy. Mıchýrın turǵyn alaby. Internatsıonalnyı turǵyn alaby. Sý qubyrynyń syrtqy ınjenerlik jelileri» jobasyn júzege asyrý sheńberinde Aınakól - M.Tólebaev qıylysy jáne M.Tólebaev - R.Qoshqarbaev kósheleriniń qıylysynda sý qubyry jelilerin ornatý boıynsha jumystar júrgizýdi josparlap otyr.
Osyǵan baılanysty, aǵymdaǵy jyldyń 2-25 qazan aralyǵynda kórsetilgen ýchaskede kólikterdiń qozǵalysy jartylaı jabylady.
Basqarma elorda turǵyndary men qonaqtary qala joldarynda keptelis týdyrmaý úshin jol qozǵalysy baǵyttaryn aldyn ala josparlaý qajettigin eskertedi.
