Elordada úsh aılyq jolaqy kartalary engizildi
ASTANA. QazAqparat - Erteń, 1 qańtardan bastap, Astanada aılyq jolaqy bıletteriniń qaǵaz nusqasyn alyp tastaý josparlanǵan. Onyń ornyna bir aılyq elektrondy kartalar satyla bastady. Budan bólek, úsh aılyq kartalar da bolady. Bunyń barlyǵy arnaıy kassalarda satylady, dep xabarlaıdy QazAqparat tilshisi elordanyń medıaortalyǵyna silteme jasap.
Resmı aqparatqa sáıkes, úsh aılyq tarıfi bar elektrondy kartalarǵa ıesiniń aty-jóni jáne taǵy basqa málimetter engiziledi. Sondyqtan ony joǵaltqan jaǵdaıda arnaıy kassaǵa baryp, eshbir qıyndyqsyz qaıta qalpyna keltirýge bolady. Dalada turǵan RTVM-avtomattarda ondaı qyzmet joq. Sondyqtan tek arnaıy kassaǵa ǵana barý qajet.
Jalpy, búginde qala boıynsha 36 jerde ASTRA PLAT kartalary satylady. Alaıda tek 7 arnaıy kassada bir jáne úsh aılyq jolaqy kartalary satylýda. Atalǵan kassalar Nájimedenov, 10/2 ("ASTRA Parking" keńsesi), Petrov, 24 ("Eýrazııa" saýda ortalyǵy, № 051 býtık), Gete kóshesi, 5 ("Saparjaı Astana" avtovokzaly), Bógenbaı batyr dańǵyly, 68 ( "Álem" saýda ortalyǵy, ekinshi qabat, 12-býtık), Qabanbaı batyr dańǵyly, 5 ("Astanalyq tsırk"), Jeńic dańǵyly, 47 ("Jeńic" saýda ortalyǵy, úshinshi qabat) jáne Qajymuqan Muńaıtpasov, 14 ("Biliktilik ortalyǵy") mekenjaılary boıynsha ornalasqan.
"2018 jyldan bastap biz qaǵaz júzindegi aılyq jolaqy bıletterinen "Aılyq jol júrý" tarıfine kóshetin bolamyz. Ony basqa tarıfter sııaqty kólik kartasyna júkteýge múmkindik bar. Atalǵan qyzmet jolaýshylar úshin yńǵaıly bolmaq. Sondaı-aq, qazirgi tarıfterge degen naqty suranysty anyqtaýǵa múmkindik beredi", - delingen "Astana LRT" kompanııasynyń resmı xabarlamasynda.
Aıta ketken jón, jańa jyldan bastap barlyq qoǵamdyq kólikterde elektrondy júıe engizilse de, jol júrý aqysyn qolma-qol aqshamen tóleý de qatar júredi.
