Elordada úsh aýysymmen bilim beretin 4 mektep bar

NUR-SULTAN. QazAqparat – Astanada úsh aýysymmen isteıtin 4, al bala sany shamadan tys kóp 15 mektep bar. Bul týraly bıylǵy oqý jylyna daıyndyq barysyn baıandaǵan Nur-Sultan qalalyq bilim basqarmasynyń basshysy Qasymhan Senǵazyev málimdedi, dep habarlaıdy QazAqparat tilshisi.

«Úsh aýysymdy jáne bala sany shetki normadan artyq mektepter máselesin sheshý maqsatynda bıyl jyl sońyna deıin 23 myń oryndyq 11 mektep paıdalanýǵa beriledi. Bul óz kezeginde 7 mekteptiń shamadan tys júktemesin azaıtýdy múmkindik etedi. 2025 jylǵa deıingi jol kartasyna sáıkes, 80 myńnan astam orynǵa arnalǵan 67 mektep salý josparlanǵan», - dep atap ótti ol.

Qasymhan Senǵazyevtiń aıtýynsha, elorda oqýshylary 25 tamyzǵa deıin oqýlyqtarmen jáne oqý-ádistemelik quraldarymen 100 paıyz qamtamasyz etiledi.

«Bıylǵy oqý jylynda birinshi synypqa 26 myńǵa jýyq bala barady. Oqýlyqtarǵa keletin bolsaq, 1-11 synyp aralyǵyndaǵy oqýshylarǵa arnalǵan 2,5 mln-nan astam kitap bar. Aǵymdaǵy jyly 2-synyp oqýshylary qaıta shyǵarylǵan, jańartylǵan oqýlyqtarmen bilim alady. Bul kitaptardyń alǵashqy legi 12 tamyzda jetkiziledi. Olar 15 tamyzdan bastap tabystalady. 25 tamyzǵa deıin elorda oqýshylary 100 paıyz oqýlyqtarmen jáne oqý-ádistemelik quraldarymen qamtamasyz etiledi. Balalar sanynyń kóbeıýine baılanysty 1 mln-nan astam ekzemplıar qosymsha satyp alynady», - dedi bilim basqarmasynyń basshysy.

Eske salsaq, búgin respýblıkalyq tamyz konferentsııasynda Oqý-aǵartý mınıstri Ashat Aımaǵambetov aýyl mektepteriniń basty problemalaryn baıandaǵan bolatyn. Mınıstr aýyl mektepteriniń qandaı basymdyǵy baryn da aıtty.