Elordada úsh aýysymdy mektepter máselesi qashan sheshiledi
NUR-SULTAN. QazAqparat – Elordalyq bilim basqarmasynyń ókilderi qaladaǵy úsh aýysymdy mektepterdiń máselesi qashan sheshiletinin aıtyp berdi, dep habarlaıdy QazAqparat tilshisi.
Nur-Sultan qalasy bilim basqarmasynyń basshysy Ánýar Janǵozınniń sózine qaraǵanda, bıylǵy oqý jylynda elorda mektepterinde 173 myń oqýshy bilim almaq. Onyń 22 myńy alǵash ret mektep tabaldyryǵyn attap otyr.
«Jyl sońyna deıin taǵy 3 jaǵa mektep pen 4 qosymsha qurylysty qoldanysqa bermekpiz. Osynyń arqasynda úsh aýysymmen jumys isteıtin 2 mekteptiń máselesin sheshemiz. Sonda da qaladaǵy 8 mektepte úsh aýysymdyq júıe saqtalady. Bul máseleni aldaǵy 3-4 jyldyń ishinde jańa mektepter salý arqyly sheshemiz», - dedi Ánýar Janǵozın Abaı Qunanbaıuly atyndaǵy №87 mektep-gımnazııanyń ashylý saltanatynan keıin.
Basqarma basshysy BAQ ókilderine mektep salýǵa atsalysqan ınvestorlarǵa qurylysqa arnalǵan jer tegin beriletinin aıtty.
«Qyzmet aqysy aıyna 80 myń teńgeniń kóleminde bolatyn mektepter suranysqa ıe ekenin kórip otyrmyz. Ata-analar qyzyqpasa, qazirgideı kezek paıda bolmas edi. Mundaı mektepter kóbeıgen saıyn báseke artyp, bilim sapasy joǵary, baǵasy arzan bola túsedi», - dedi Ánýar Janǵozın.
Eske salsaq, búgin QR Premer-Mınıstri Asqar Mamın Nur-Sultanda Abaı Qunanbaıuly atyndaǵy №87 mektep-gımnazııanyń ashylý saltanatyna qatysty.
