Elordada úsh aǵaıyndy jigit qurylys alańynda urlyqpen aınalysqan
NUR-SULTAN. QazAqparat – Elordada qurylys alańynan mys kabel urlap, satýmen aınalysty degen kúdikpen aǵaıyndy úsh jigit ustaldy. Bul jaıynda Nur-Sultan qalalyq polıtsııa departamentinen málim etti, dep habarlaıdy QazAqparat tilshisi.
«Bireýi 18 jáne ekeýi 21 jastaǵy úsh aǵaıyndy jigit qurylys alańynda aýysymmen qara jumysshy bolyp eńbek etken. Kompanııa usynǵan jataqhananyń bir bólmesinde turǵan. Urlyq jasaýdy oıǵa alǵan olar toptaryna 18 jastaǵy bir áriptesterin qosyp alǵan. Túngi aýysym kezinde toptyń 2 múshesi qurylys alańynan mys kabel jınaýmen aınalysqan. Al dál osy ýaqytta qalǵan eki kúdikti nysanǵa jaqyn jerge kólikterimen kelip, kútken. Olar qorshaýdan sybaılastary mys kabelderin laqtyrǵan kezde, ony kólikterin tıep, oqıǵa ornynan boı tasalap otyrǵan. Kelesi kúni urlanǵan kabelderdi metall qabyldaıtyn pýnktterge satyp jiberip, túsken aqshany ózara bólisip, qajetterine jaratqan», - dep atap ótedi departamentten.
Vedomstvo málimetinshe, jeńil jolmen aqsha tabýdyń dámin tatqandardyń taǵy da bir ret kabel urlaǵandary belgili bolyp otyr. Shyǵynnyń jalpy somasy 960 myń teńgeni quraıdy. Polıtsııa qyzmetkerleri jedel izdestirý is-sharalary barysynda urlyq jasaý kúdigimen 4 jumysshyny ustady. Olar kinálaryn moıyndap, zattaı aıǵaqtar tárkilengen.
Qazirgi ýaqytta kúdiktilerdiń qala aýmaǵynda jasalǵan dál osyndaı qylmystarǵa qatysy tekserilip jatyr.
