Elordada usaq buzaqylyq faktileriniń sany aıtarlyqtaı azaıdy
ASTANA. KAZINFORM – Astana qalasy ákimshilik quqyq buzýshylyqtar jónindegi mamandandyrylǵan aýdanaralyq sotynyń tóraǵasy Baýyrjan Ahmetqalıev usaq buzaqylyqtar, sonyń ishinde kópshilik orynda bylapyt sózder aıtý boıynsha málimdeme jasady.
Qalalyq kommýnıkatsııalar qyzmetinde ótken brıfıngte ol qoǵamdyq oryndarda beıádep sóz aıtqan azamattar Ákimshilik quqyq buzýshylyq týraly kodekstiń 434-baby, ıaǵnı «Usaq buzaqylyq» boıynsha jaýapkershilikke tartylatynyn atap ótti.
– Mundaı quqyqbuzýshylyq kóshelerde, saıabaqtarda, qoǵamdyq kólikterde, memlekettik mekemelerde, saýda jáne oıyn-saýyq ortalyqtarynda, bilim berý oryndarynda, vokzaldarda, áýejaılarda t.b. qoǵamdyq oryndarda jasalýy múmkin. Áleýmettik jelilerde tikeleı efırlerde nemese basqa da kópshilikke qoljetimdi ınternet platformalarynda jarııa túrde bylapyt sóıleý qoǵamdyq tártiptiń buzylýyna ákep soqsa, mundaı áreketter QR Ákimshilik quqyq buzýshylyq týraly kodeksiniń 434-baby boıynsha saralanady, – dedi Baýyrjan Ahmetqalıev.
Sonymen qatar, 2026 jyldyń birinshi jartyjyldyǵynda sot óndirisine usaq buzaqylyqqa qatysty 2 131 ákimshilik quqyq buzýshylyq týraly is kelip túsip, onyń 2120-sy qaralǵan. 2024 jyly 2 277 is túsip, 2 261-i qaralsa, ótken jyly 3738 is tirkelip, 3720 is boıynsha sheshim qabyldanǵan. 2026 jyldyń birinshi jartyjyldyǵyndaǵy kórsetkishter ótken jyldyń osy kezeńimen salystyrǵanda túsken ister sany boıynsha 1461 iske, al qaralǵan ister boıynsha 1459 iske azaıǵan.
Aıta keteıik, buǵan deıin TikTok pen Instagram-da beıádep sóz aıtqan Almaty oblysynyń turǵyny qamaýǵa alynǵanyn jazǵanbyz.
