Elordada ury turǵyn úıdiń azyq-túligine deıin «sypyryp» ketken
NUR-SULTAN. QazAqparat – Elordada kúdikti turǵyn úıdegi qymbat zattarmen qatar azyq-túlikti de «sypyryp» ketken. Bul týraly Nur-Sultan qalanyń Polıtsııa departamenti baspasóz qyzmetinen habarlady.
Baspasóz málimetterine qaraǵanda, elordadaǵy Jalyn kóshesin patrýldeý kezinde polıtseıler qolynda eki tony bar mas adamdy baıqap qalǵan. Ol turǵyn úıden urlyq jasaǵanyn moıyndady.
Tártip saqshylary 31 jastaǵy kúdiktiniń qulypty buzyp, úıdiń úsh bólmesinen tońazytqyshtaǵy azyq-túlikke deıin barlyq zatty shyǵarǵanyn anyqtady. Urlanǵan múliktiń kóp ekenin jáne ony jalǵyz alyp kete almaıtynyn túsingen er adam olardy kóshede qar astyna jasyrǵan. Sóıtip ol kompıýter monıtoryn, protsessor, pernetaqta, teledıdar, tipti tamaqty da jasyryp úlgergen. Kúdikti qarakúzen men aq túlki terisinen jasalǵan tondardy ǵana ózimen birge alyp júrgen. Olardy jaqyn jerdegi lombardqa tapsyrmaq bolǵan, alaıda ony polıtsııa ustap aldy.
Kúdikti urlyq jasaǵanyn moıyndady. Urlanǵan zattardy polıtsııa taýyp alyp, ıelerine qaıtaryp berdi.
Atalǵan fakti boıynsha QR QK 188-baby 3-bóligi («Urlyq») boıynsha sotqa deıingi tergeý júrgizilýde. Ustalǵan adamnyń elorda aýmaǵynda osyǵan uqsas buryn jasalǵan qylmystarǵa qatystylyǵy anyqtalýda.
