Elordada ury aýlada oınap júrgen baladan kilt alyp, páterdi tonaǵan
NUR-SULTAN. QazAqparat – Astanalyq polıtseıler aýlada oınap júrgen baladan kilt alyp, páterden 8 mln teńgeniń buıymyn qoldy etken 23 jastaǵy jigitti ustady, dep habarlaıdy QazAqparat Nur-Sultan qalasy polıtsııa departamentiniń baspasóz qyzmetine silteme jasap.
Anyqtalǵandaı, ata-anasy úıde joq kezde 10 jasar bala aýlaǵa dop tebýge shyǵady. Mán-jaıǵa qanyq bolǵan jigit balanyń sómkesinen kiltti alyp, páterge kirgen de, zergerlik buıymdar men kompıýter tehnıkalaryn qoldy etken.
Polıtseıler úsh kúnde kúdiktiniń kim ekenin anyqtap, ustady. Ol Qyzylorda oblysynyń týmasy bolyp shyqty. Polıtseıler lombardqa tapsyrylǵan zattardy alyp, ıelerine qaıtaryp berdi.
Kúdikti kinásin moıyndady. Qazirgi ýaqytta QR Qylmystyq kodeksiniń «Urlyq» babymen sotqa deıingi tergep-tekserý júrip jatyr.
