Elordada urlyq jasaýmen aınalysyp júrgen 57 jastaǵy áıel ustaldy
NUR-SULTAN. QazAqparat – Elordanyń halyq kóp shoǵyrlanatyn oryndarynda urlyq jasaýmen aınalysyp júrgen áıel ustaldy, dep habarlaıdy QazAqparat Nur-Sultan qalalyq Polıtsııa departamentiniń baspasóz qyzmetine silteme jasap.
Baspasóz qyzmetiniń málimetterine qaraǵanda, Shyǵys Qazaqstan oblysynyń 57 jastaǵy týmasy túrli baptar boıynsha buryn 10 ret isti bolǵan. Sondaı-aq jeke múlik urlyǵy úshin 5 ret qylmystyq jaýapqa tartylǵan. Soǵan qaramastan ol qylmys jasaýyn toqtatpaǵan.
Ol «kásibin» negizinen bazar, saýda úıleri jáne iri saýda-oıyn-saýyq ortalyqtary sııaqty jerlerde júzege asyryp kelgen.
«Birde ortalyq bazardaǵy býtıkke kirip, bir áıeldiń uıaly telefony men 205 myń teńgesi bar sómkesin urlap ketken. Osyǵan uqsas urlyqtardy «Shanhaı» bazary men «Dáýlet» saýda úıiniń aýmaǵynda da jasaǵan. Munda da sórede jatqan sómkelerdi urlap ketken, onyń bireýinde 150 myń teńge bolǵan. Taǵy bir sómkede 250 myń teńge, sondaı-aq bank kartalary, qujattar men dári-dármekter (shyǵyn 500 myń teńge) bolǵan.
«Jedel-izdestirý is-sharalary barysynda anyqtalyp, ustalǵan kúdikti polıtsııaǵa jetkizilip, osy urlyqtardy jasaǵanyn moıyndady. Atalǵan faktiler boıynsha QR QK 188-baby («Urlyq») boıynsha sotqa deıingi tergeý amaldary júrgizilýde. Ustalǵan azamat qamaýda otyr. Tergeý júrgizilip, onyń elorda aýmaǵynda buryn jasalǵan uqsas qylmystarǵa qatystylyǵy anyqtalýda. Osy adamnyń zańǵa qaıshy áreketterinen zardap shekkender bolsa, Beıbitshilik, 19 mekenjaıy boıynsha Nur-Sultan qalasynyń Polıtsııa departamentine habarlasyp, nemese 8 (7172) 71-61-51; 71-60-69, 87025009729 jáne «102» nómirine qońyraý shala alady»,-delingen polıtsııanyń habarlamasynda.
