Elordada urlyq azaıdy - polıtsııa
NUR-SULTAN. QazAqparat – Bıylǵy jyldyń 9 aıynda urlyqtar sany ótken jylmen salystyrǵanda 53,8%-ǵa azaıǵan, dep habarlaıdy QazAqparat Nur-Sultan qalasynyń Polıtsııa departamentine silteme jasap.
2019 jyldyń osy kezeńinde qala aýmaǵynda 7989 urlyq tirkelse, bıyl onyń sany 3693-ke deıin tómendegen.
Astanalyq Polıtsııa departamentiniń basshysy Erjan Sadenov bóten adamnyń múlkin urlaýǵa qarsy is-qımyl týraly aıtyp, urlyqtyń statıstıkasyna qatysty málimetter berdi.
«Páter men avtokólik tonaý eki eseden asa azaıdy. Avtokólik salonyna urlyqqa túsý jaǵdaıy 30,3%-ǵa tómendegen. Qalta urylarynyń sany tórt esege qysqardy. 2019 jyldyń toǵyz aıynda astanada 1143 qaltaǵa túsý áreketi tirkelse, 2020 jyldyń osy kezeńinde 300 oqıǵa anyqtalǵan», - dep atap ótti departament basshysy Erjan Sadenov.
Urylardy tabý men urlyq sanynyń azaıýyna polıtsııa júrgizip jatqan aldyn alý sharalarynyń yqpal zor.
Urlyqtyń aldyn alý maqsatynda «Páter», «Saıajaı», «Avtokólik» tekserý sharalary turaqty túrde júrgizilip otyrady. Qala syrtyndaǵy Kóktal, Ońtústik-Shyǵys, Úrker, Lesozavod, Sılıkatnyı, Ilınka aýyly, «Gazovaıa apparatýra» mańynda urlyqty ashý maqsatynda barlaý jumystary júrgiziledi. Vokzal mańynda, «Astanalyq bazar», «Esil», «Beıbarys» saýda úıi mańdarynda kúdikti adamdarǵa tekserý jumystary uıymdastyrylǵan.
2020 jyldan bastap ǵımarattyń ishine kirip urlyq jasaýdy aýyr qylmys qataryna jatqyzdy. Endi mundaı qylmys jasaǵan azamattar 2 jyldan 7 jylǵa deıin bas bostandyǵynan aıyrylýy múmkin.
2020 jyldyń 10 aıynda polıtsııa qyzmetkerleri elorda aýmaǵynan 243 qylmys jasaǵan 82 qylmystyq topty qolǵa túsirdi.
