Elordada urlanǵan avtokólikterdiń 20%-y shetelden ákelingen
«Eger shetelden ákelingen avtokólik urlanǵan nemese qylmystyq iske qatysy bolsa ol aıyppul turaǵyna jiberiledi. Sodan soń táýlik ishinde ákelgen elge avtokóliktiń tabylǵany týraly habarlama jiberiledi. Bizge syrttan kólik kóbinese Reseıden keledi. Mysaly, kólik Reseıde urlanyp, Qazaqstannan tabyldy delik. TMD elderine ortaq zańǵa sáıkes Reseı jaǵy 1 jyldyń ishinde urlanǵan kólikke qatysty sotqa júgine alady. Jergilikti sottyń sheshimine sáıkes urlanǵan kólik ne Reseıge jiberiledi ne bolmasa elde qaldyrylady», - dedi Nur-Sultan qalasy polıtsııa departamenti krımınaldyq polıtsııa basqarmasynyń bólim basshysy Dıas Qadirov departamentte ótken baspasóz máslıhatynda.
Onyń aıtýynsha, shetelden zańdy ákelingen avtokólikti Qazaqstanda tirkep, qoldanýǵa ruqsat.
«Buǵan deıin aıtqanymdaı, ótken jyly elordada 113 kólik urlandy. Onyń 20 paıyzy shetelden ákelingen. Jaǵdaı ártúrli. Aıtar bolsaq, adam kólikti satyp alady, keıin ony bireý urlap ketedi. Belgili bir ýaqyttan soń urlanǵan kólik tabylady. Tabylǵan kóliktiń tarıhyn zertteı kele, onyń shetelden urlanyp ákelgeni anyqtalady. Kórdińiz ba? Másele qaıda jatyr. ıAǵnı avtokólik satyp alǵan adam onyń urlanǵan, ıaǵnı izdeýde ekenin bilmeıdi. Ondaı jaǵdaıda kólik ıesi ekenin dáleldeý qıynǵa soǵady. Keıbir jeńil kólikter Reseıde esepten shyǵarylǵanymen, Qazaqstanda tirkelmegen bolyp shyǵady. Sondyqtan kólikti zańǵa sáıkes tirkep, qoldanǵan jón», - deıdi ol.
Buǵan deıin polıtsııa departamenti ókili astanalyq urylardyń keıpin sýrettep berdi.
Sondaı-aq, brıfıngte elordada urlyq kóbine qaı jerde jasalatyny týraly aıtyldy.
Odan bólek, Qazaqstanda urlyq jasaý qylmysy boıynsha jazanyń qatańdatylǵany belgili boldy.