Elordada Uly Jeńistiń 65 jyldyǵyna arnalǵan kórme ashyldy.
Astana qalalyq muraǵattar jáne qujattamalar basqarmasynyń bastamasymen uıymdastyrylǵan kórmede Aqmolada jasaqtalǵan atqyshtar dıvızııalarynyń jaýyngerlerine qatysty qujattar alǵash ret qoıylyp otyr. Baǵaly jádigerler RF Qorǵanys mınıstrliginiń Ortalyq muraǵatynan alynǵan. Atalǵan qujattardyń barlyǵyna "qupııalyq" belgisi qoıylyp, ol 2003-2009 jyldarda ǵana óz kúshin joıǵan bolatyn.
Kórmeniń ashylý rásimine qatysyp, sóz sóılegen Reseıdiń Qazaqstandaǵy Tótenshe jáne Ókiletti elshisi Mıhaıl Bocharnıkov elimizde Uly Otan soǵysy, onda erlik kórsetken batyrlar qasıetti qundylyq retinde baǵalanatyndyǵyn atap ótti.
"Búgin biz Uly Otan soǵysyna qatysqan qazaqstandyqtardyń erlikterin pash etetin qundy qujattardy kóremiz. Bul ásirese ekinshi dúnıejúzilik soǵystyń mańyzyn ózgertýge tyrysyp, tarıhty burmalaýǵa talpynysty baıqap otyrǵan kezeńde óte mańyzdy", dedi Elshi.
Sonymen, sol bir surapyl jyldary Aqmolada 3 áskerı quramanyń shtabtary ornalasqan. Onda 310-shy, 387-shi jáne 29-shy atqyshtar dıvızııalary jasaqtalyp, maıdan shebine jiberildi. Osyǵan oraı kórmede Aqmolada ótkizilgen áskerı-uıymdastyrý jumystaryna, sol kezeńdegi qala ekonomıkasyna, tyldaǵylardyń maıdanǵa kórsetken kómekterine qatysty qujattar qoıylǵan. Máselen, kórmedegi qujattarǵa sáıkes qala jurtshylyǵy arnaýly tank kolonnasy men avıaeskadrılıa jasaqtaýǵa 4 mıllıonǵa jýyq qarjy jınaǵan.
Sondaı-aq kórmeden aqmolalyq jaýyngerlerdiń muraǵat qoryna tapsyrǵan áskerı kitapshalaryn, Bas qolbasshynyń alǵys hatyn, soldattardyń úshburyshty hattaryn, fotosýretterdi kórýge bolady.
