Elordada ulty qazaq azamattardyń aty-jóniniń rásimdelýin retteý máselesine arnalǵan dóńgelek ústel ótti

Ulty qazaq azamattardyń aty-jóniniń rásimdelýi QR Prezıdentiniń 1996 jylǵy sáýirdiń 2-indegi «Ulty qazaq azamattardyń tegi men ákesiniń atyn jazýǵa baılanysty máselelerdi retteý tártibi týraly» Jarlyǵyna jáne el Úkimetiniń 1999 jylǵy mamyrdyń 22-indegi «Qazaqstan Respýblıkasyndaǵy azamattyq hal-ahýal aktilerin tirkeý, taǵy basqa erejelerdi bekitý týraly» qaýlysyna sáıkes júrgizilip kele jatqandyǵyn atap ótken QR Mádenıet jáne aqparat mınıstrligi Til komıtetiniń tóraǵasy Erbol Shaımerden «alaıda qazaq esimderin durys jazý normalary qoldanystaǵy quqyqtyq-normatıvtik aktilerde tolyq rettelmegen. Muny osy salanyń mamandary da moıyndaıdy», dedi.

Onyń aıtýynsha, sońǵy kezde ulty qazaq azamattardyń, ásirese oralmandardyń osy máseleler boıynsha aryz-shaǵymdary kóbeıe túsken. Til komıteti tóraǵasynyń keltirgen deregine sáıkes, ulty qazaq azamattardyń jeke kýálikteriniń 90 paıyzy orys tilinde toltyrylǵan.

Al qazaqtardyń dástúrli aty-jónine ústemshil-ákimshil jolmen telingen orys tiliniń -ov, -ev, -ova, -eva syndy affıksterdi qujattarynan alyp tastaýǵa ásirese jastar arasynan ótinishtiń kóp túsetindigin atap ótken №2 Halyqqa qyzmet kórsetý ortalyǵy dırektorynyń orynbasary Qojahmet Shopanulynyń sózine qaraǵanda, bul óte qysqa merzimde atarylatyn is-shara. «Degenmen, azamat jeke kýáligimen qatar basqa qujattarynda, atap aıtqanda, kólik júrgizý kýáligi, dıplom, neke kýáligin de aýystyrýyna týra keledi. Qazirgi ýaqytta kóptegen azamattar qujat rásimdeý merziminiń uzaqtyǵyna baılanysty bas tartyp otyr», dedi.

Qazaq azamattarynyń aty-jónderin retke keltirý jáne jazý kezinde negizgi antroponımııalyq qaǵıdattaryn saqtaý, halyq arasynda túsindirý jumystaryn júrgizý, tıisti aqparat taratý maqsatynda uıymdastyrylǵan dóńgelek ústel jumysyna QR Parlamenti Májilisiniń depýtattary, Úkimet janyndaǵy Memlekettik onomastıka komıssııasynyń músheleri, zııaly qaýym ókilderi, zertteýshi ǵalymdar qatysty.