Elordada Ulttyq ulan sarbazdary otqa oranǵan úıden úsh gaz ballonyn alyp shyqty
NUR-SULTAN. QazAqparat – Elordada Ulttyq ulan sarbazdary otqa oranǵan úıdiń ishinen úsh gaz ballonyn alyp shyqty. Bul týraly Ulttyq ulan baspasóz qyzmetinen málim boldy, dep habarlaıdy QazAqparat.
Belgili bolǵandaı, 6 naýryz kúni keshqurym Ulttyq ulan patrýli kóshede janushyra kómek suraǵan áıeldiń daýysyn estip qalady. Atalǵan áıel turǵan jerge barǵan kezde, olar Balqantaý kóshesi boıynda turǵan úıdiń órtenip jatqanyn kóredi. Áskerı qyzmetshiler shuǵyl túrde 101 pýltine habar berip, órtti sóndirýge kirisken. Bes mınýttan keıin oqıǵa ornyna áskerı narıadtar boıynsha kezekshi kapıtan Jeńis Quramysov kelip, qyzmettesterimen birge úıden úsh gaz ballonyn alyp shyqty.
Jarty saǵattan keıin órt sóndirý ekıpajy kelip, áskerı qyzmetshilerdiń birlesken áreketimen qyzyl jalyn aýyzdyqtaldy.
«Sarbazdardyń batyl is-qımyldary úshin úı ıesi alǵys aıtty. Jaqyn arada Ulttyq ulan 5573 áskerı bóliminiń komandıri atalǵan áskerı qyzmetshilerdi yntalandyrý sharalaryn uıymdastyrady dep kútilýde», - delingen habarlamada.
