Elordada Ulttyq pikirsaıys týrnıriniń ashylý saltanaty ótti
M. Nárikbaev atyndaǵy QazGZÝ-de Qazaqstan Respýblıkasy Táýelsizdiginiń 30 jyldyǵy men Tuńǵysh Prezıdent kúnine arnalǵan Ulttyq pikirsaıys týrnıriniń ashylýy ótti.
Ulttyq týrnır Nursultan Nazarbaev Qory «Elbasy akademııasynyń» qoldaýymen ótýde. Týrnır uıymdastyrýshylary – Ulttyq pikirsaıys federatsııasy.
Týrnırge óz óńirlerinde irikteý kezeńderinen ótken 80 pikirsaıysshy qatysýda. Aǵymdaǵy jyldyń 1-23 qarashasy aralyǵynda barlyq Respýblıkalyq mańyzy bar qalalar men oblys ortalyqtarynda irikteý kezeńderi ótip, jalpy 530 pikirsaıysshy arasynan úzdikteri anyqtaldy. Týrnırge JOO bólek, kolledj stýdentteri de qatysady.
Týrnır amerıkandyq jáne brıtandyq parlamenttik formatta qazaq jáne orys tilderinde uıymdastyrylyp, týrnırdiń úzdik spıkeri Lınkoln-Dýglas formaty boıynsha anyqtalady.
Týrnırdiń ashylý saltanatynda Elbasy akademııasynyń basqarýshy dırektory Murat Jumanbaı, QazGZÝ rektory, Nur-Sultan qalalyq máslıhatynyń depýtaty Talǵat Nárikbaev, Ulttyq pikirsaıys federatsııasynyń prezıdenti Bolat Buharbaı qatysty.
«Sońǵy jyldary elimizde barlyq oblysty qamtıtyn ulttyq deńgeıdegi stýdenttik pikirsaıys týrnıri ótkizilgen joq. Bul týrnırdiń ereksheligi – elimiz boıynsha óz óńirlerinde jeńiske jetken eń úzdik komandalardyń qatysýy. Elbasy Akademııasy aldaǵy ýaqytta da pikirsaıys qozǵalysyn qoldaıtyn bolady», - dep atap ótti Murat Jumanbaı.
Elordaǵa jınalǵan úzdik pikirsaıysshylar eki kún boıy qazaq jáne orys lıgalarynda júldeli oryndarǵa ózara baq synaspaq.
Aıta keterligi, eki kún boıy jalǵasatyn respýblıkalyq týrnırdiń jalpy júlde qory 2 000 000 teńgeni quraıdy.
