Elordada Ulttyq ulannyń bastamasymen «Cyber sarbaz» synyby ashyldy

ASTANA. KAZINFORM – Astana qalasyndaǵy № 115 mektepte «Jas búrkit» patrıottyq klýbynyń «Cyber sarbaz» synyby ashyldy. Joba Qazaqstan Respýblıkasy Ulttyq ulanynyń 5573 áskerı bóliminiń bastamasymen qolǵa alyndy.

Jańa synyp quramyna 23 oqýshy qabyldandy. Saltanatty rásim barysynda olar Ulttyq ulannyń aıryqsha nyshany sanalatyn qyzyl-qońyr jolaq keýdeshe, «Jas búrkit» keýde belgileri jáne arnaıy kýáliktermen marapattaldy.

Іs-sharada sóz sóılegen 5573 áskerı bólim komandıriniń tárbıe jáne áleýmettik-quqyqtyq jumystar jónindegi orynbasary Aslan Orazalın bastamanyń mańyzyna toqtaldy.

– Jastardyń aqparattyq qaýipsizdik negizderin meńgerýi – ýaqyt talaby. «Cyber sarbaz» synyby jas urpaqtyń boıynda otansúıgishtikpen qatar tártip, jaýapkershilik jáne zamanaýı bilim qalyptastyrady, - dedi ol.

Joba aıasynda oqýshylarǵa patrıottyq tárbıe berýmen qatar tsıfrlyq saýattylyqty arttyrý, aqparattyq qaýipsizdik negizderin úıretý, kıberkeńistiktegi qaýip-qaterlerdiń aldyn alý jáne quqyqtyq mádenıetti qalyptastyrý baǵytynda júıeli jumystar júrgiziledi.

Aıta keteıik, bul bastama bilim berý uıymy men áskerı qurylym arasyndaǵy ózara yntymaqtastyqty nyǵaıtyp, óskeleń urpaqty tárbıeleýdiń tıimdi úlgisin kórsetedi. Ulttyq ulannyń elordalyq áskerı bólimi qolǵa alǵan joba patrıottyq tárbıeni zaman talabyna saı jańǵyrtyp, jastardyń el bolashaǵyna degen jaýapkershiligin arttyrýǵa baǵyttalǵan.

Eske sala keteıik, buǵan deıin Ulttyq ulanda 7 tilde erkin sóıleıtin polıglot sarbaz áskerı mindetin atqaryp júrgenin jazǵanbyz.