Elordada Ulttyq ulan sarbazdary 5 kúndik jıyn ótkizdi
ASTANA. KAZINFORM - Elordada 5573 áskerı bóliminiń bazasynda Ulttyq ulannyń sarbazdary bes kúndik jedel jıyn ótkizdi.
Jıyn quqyqtyq tártip áskeriniń bıylǵy josparyna sáıkes Іshki ister mınıstri polıtsııa general-leıtenanty Erjan Sádenov pen Іshki ister mınıstriniń orynbasary – Ulttyq ulannyń Bas qolbasshysy general-leıtenant Erkin Botaqanovtyń basshylyǵymen ótti.
Іs-sharanyń basty maqsaty ofıtserlerdiń jaýyngerlik daıarlyq is-sharalaryn uıymdastyrý men ótkizýdegi ádistemelik daǵdylaryn jetildirý, áskerlerdiń jaýyngerlik qyzmetiniń aspektilerin jaqsartý, sondaı-aq komandırlerdiń biliktiligi men sheberligin arttyrý, ozyq tájirıbemen almasý, atys jáne ádistemelik daıarlyqty tekserý boldy.
Jıyn barysynda oqý-jattyǵýlar ótti. Komandırler dalalyq jaǵdaıda armııalyq oqytýdyń «Men sııaqty iste!» qaǵıdatyn basshylyqqa ala otyryp, is júzinde alǵa qoıylǵan mindetterdi oryndady. Óıtkeni, komandır jeke quram úshin úlgi bolyp sanalady.
Bes kún ishinde komandırler kásiptik-laýazymdyq daıarlyq, taktıka jáne jedel óner, sondaı-aq atys daıarlyǵy men áskerlerdi basqarýdyń negizgi pánderi boıynsha synaqtardan ótti. Sonymen qatar, jıynǵa qatysýshylar basshylyq qujattar men buıryqtardy bilý boıynsha testileýden ótti. Bul rette jıyndy uıymdastyrýshylar tájirıbelik sabaqtardy ótkizýge basa nazar aýdardy, onda komandırler ártúrli qarý túrlerinen, sonyń ishinde túngi jaǵdaılarda atý boıynsha óz daǵdylaryn kórsetti. Sondaı-aq naqty urys jaǵdaılaryna beıimdelgen túrli sıgnaldar boıynsha is-qımyldardy pysyqtady.
Sabaq kestesine sáıkes jıyndardy ótkizý baǵdarlamasynda demonstratsııalyq, nusqaýshy-ádistemelik jáne praktıkalyq sabaqtar ótkizý kózdeldi, onyń barysynda jıynǵa qatysýshylarǵa áskerlerdiń qyzmettik-jaýyngerlik qyzmetiniń negizgi baǵyttaryn aıqyndaıtyn basshylyq qujattar men dırektıvalardyń erejeleri jetkizildi.
Ekinshi kúni 5573 áskerı bóliminiń sport kesheninde ofıtserler úshin qoıan-qoltyq urystan sabaq ótkizý ádistemesi boıynsha oqý ótkizildi. Bul rette komandırlerden qoıan-qoltyq urys tásilderin meńgerý boıynsha synaqtar qabyldandy.
Sonymen qatar, taktıka jáne jedel óner, taktıkalyq-atys daıarlyǵy, baılanys jáne áskerı-medıtsınalyq daıyndyq boıynsha sabaqtar da ótti.
Aqmola oblysynyń aýmaǵynda ornalasqan Memlekettik kúzet qyzmetiniń «Maılan» polıgonynda jedel jınalýdyń úshinshi kúni Ulttyq ulannyń komandalyq quramy dalalyq jaǵdaılarda jaýyngerlik daıarlyqtyń taktıkalyq tásilderin pysyqtaýǵa kiristi. Atap aıtqanda, komandırler tehnıkalyq daıyndyq, atý, taktıka jáne operatıvtik óner boıynsha jattyǵýlar oryndaıtyn keshendi sabaqtarǵa qatysty.
Jıynǵa qatysýshylar jańa úlgidegi brondy dońǵalaqty mashınalardyń jaýyngerlik jáne tehnıkalyq múmkindikterimen alǵash ret tanysty. Sodan keıin olar ártúrli qarý-jaraq úlgilerinen bólimsheler (toptar) quramynda jaýyngerlik atys jasady. Sondaı-aq qatysýshylarǵa QR Memlekettik kúzet qyzmetiniń ushqyshsyz ushý apparattary bólimsheleriniń jaýyngerlik múmkindikteri kórsetildi. Al atys daıyndyǵy barysynda áskerı bólimderdiń komandırleri 57 mıllımetr kalıbrli avtomatty zenıttik zeńbirekten jáne 23 mıllımetr kalıbrli zenıttik qondyrǵydan oq atty.
Ofıtserler ár túrli qarý-jaraqpen jaýyngerlik mashınalardyń bortynan nysanany kózdep, granata laqtyrdy. Sondaı-aq áskerı qyzmetshiler úshin shartty túrde tikeleı áreket etý aımaǵynda bolǵan barlaý-izdestirý tobynyń túneýin uıymdastyrý boıynsha praktıkalyq sabaq ótkizildi.
Kelesi kúni jıyn vzvodtyq tirek pýnktin jabdyqtaý tártibi, transheıalardaǵy shabýyldaý áreketteri, jaralar men jaraqattar kezinde kómek kórsetý jáne mına alqaptarynan ótý joldary boıynsha keshendi praktıkalyq sabaqtarymen jalǵasty.
Qatysýshylar úshin qoldanbaly hımııa tsıklinde ónimder kórsetildi, sodan keıin olar ártúrli qarý úlgilerinen bólimsheler (toptar) quramynda jaýyngerlik atýdy oryndady.
Al «Qaptaǵaı» birikken oqý ortalyǵynyń avtodromynda komandırlerge brondalǵan tehnıkamen kúres tásilderi boıynsha praktıkalyq sabaq kórsetildi.
Óńirlik qolbasshylyqtardyń qolbasshylaryna jáne áskerı bólimderdiń komandırlerine dalalyq shyǵý jáne komandırlik daıyndyq sabaqtary kezinde batalon, rota jáne vzvod komandırlerimen osyndaı jergilikti jıyndardy ótkizý mindeti qoıyldy. Bul batalondyq jáne rotalyq býyn ofıtserleriniń qarý-jaraqty, tehnıkalardy, arnaıy quraldar men baılanys quraldaryn senimdi qoldaný barysyndaǵy bilimderin jetildirý úshin qajet.
