Elordada ulttyq taǵamdar jármeńkesi ótip jatyr
ASTANA. KAZINFORM — Astanada búgin saǵat 14:00-de Halyqaralyq EXPO kórme ortalyǵynda «Naýryz bazary» azyq-túlik jármeńkesi ashyldy. Munda «Altyn sapa» syılyǵynyń qatysýshylary men jeńimpazdaryn qosa alǵanda, otandyq óndirýshilerdiń ónimderi usynylǵan. Bul týraly qala ákimdiginiń resmı saıty jazdy.
Jármeńkege Qazaqstannyń 50 óndirýshisi qatysyp jatyr. Kelýshiler tabıǵı ónimderdi satyp alyp, jergilikti brendtermen tanysyp, otandyq óndiristi qoldaı alady. Ashyq aspan astyndaǵy fýdkorttar kóshesi erekshe nazar aýdartady. Munda qala turǵyndary men qonaqtary ulttyq taǵamdardan dám tatyp, merekelik atmosferany tolyq sezine alady.
Sondaı-aq munda Naýryz kójege arnalǵan úlken qazan ornatylǵan. Janynda túrli taǵamdar usynylatyn gastronomııalyq pavılondar ornalasqan: dámdi qýyrdaq, hosh ıisti ystyq baýyrsaq, toıymdy palaý jáne jańa pisken samsa.
Merekelik kóńil kúı, dámniń alýan túrliligi men keń dastarhan bul gastronomııalyq aımaqty elordadaǵy Naýryz meıramynyń basty tartymdy oryndarynyń birine aınaldyrdy. Іs-sharalar 22-23 naýryz kúnderi saǵat 10:00-den 18:00-ge deıin jalǵasady.
Aıta keteıik, qala turǵyndary elordanyń basty alańdaryna – qalalyq alańda, «Qazaq eli» monýmenti mańynda, «Astana Arena» stadıonynda, «Atatúrik» saıabaǵynda, Astana Music Hall avtoturaǵynda jáne EXPO aýmaǵynda bas qosyp, sporttyq is-sharalarǵa belsendi qatysyp jatyr.