Elordada ulttyq qolóner mektebi ashyldy

«Kreatıvti ındýstrııalardy damytý qory» korporatıvtik qory uıymdastyrǵan joba ulttyq qolónerdi saqtaýǵa, ony jas urpaq arasynda keńinen dáripteýge jáne dástúrli sheberlik sabaqtastyǵyn jalǵastyrýǵa baǵyttalǵan. Oqý baǵdarlamasy zergerlik óner, kıiz basý, kórkem toqyma, shı toqý, qysh óneri, keramıka, súıek oıý, teri jáne aǵash óńdeý sekildi on baǵytty qamtıdy.

Ulttyq qolónerdi jalǵastyratyn jańa býyn qalyptastyrý

Jobanyń ashylýynda «Kreatıvti ındýstrııalardy damytý qory» korporatıvtik qorynyń Basqarýshy keńesiniń tóraǵasy Erlan Kanalımov ulttyq qolónerdiń halqymyzdyń turmysymen, mádenıetimen jáne salt-dástúrimen tyǵyz baılanysty ekenin atap ótti.

Onyń aıtýynsha, ata-babalarymyz kúndelikti ómirge qajetti zattardyń basym bóligin óz qolymen jasaǵan. Sondyqtan qolónerdi tek kóne zamannan qalǵan mura retinde emes, ulttyń turmys-tirshiligin, dúnıetanymyn jáne shyǵarmashylyq qabiletin tanytatyn mańyzdy sala retinde qarastyrý qajet.

– Ata-analarymyz erte kezden kúndelikti turmysqa qajetti buıymdardyń barlyǵyn óz qolymen jasap otyrǵan. Sondyqtan ulttyq qolónerdiń ishinde halqymyzdyń mádenıeti de, salt-dástúri de, turmys-tirshiligi de bar. Búgin bastalyp jatqan jobanyń negizgi maqsaty – halyq arasynda sırek kezdesetin, birtindep joǵalyp bara jatqan ulttyq qolóner túrlerin qaıta jańǵyrtyp, olardy jas urpaqqa úıretý, – dedi qor tóraǵasy.

Jobaǵa elimizdiń ár óńirinen 331 qolónershi ótinim bergen. Іrikteý nátıjesinde on sheber tańdalyp, olar úsh apta boıy qatysýshylarǵa tájirıbelik sabaq ótkizedi.

– Jobany bastaǵan kezde elimizdiń túkpir-túkpirinen 331 sheber ótinim berdi. Solardyń arasynan múmkindiginshe sırek kezdesetin ulttyq qolóner túrlerin saqtap júrgen on sheberdi tańdap aldyq. Olardyń barlyǵy – óz salasynda tanylǵan, qolónerdiń qyr-syryn meńgergen tájirıbeli mamandar. Endi olar úsh apta boıy jınalǵan balalarǵa dáris berip, ár buıymnyń qalaı jasalatynyn tájirıbe júzinde kórsetedi, - dedi Erlan Kanalımov.

Onyń sózinshe, jobaǵa qatysatyn balalardy irikteý kezinde qatań shekteý qoıylmaǵan.

– Baıqaý jarııalanǵan kezde balalarǵa aıtarlyqtaı shekteý qoıǵan joqpyz. Jobaǵa 450-den astam ótinim tústi. Búgin 200-den astam bala oqýyn bastady. Úsh aptanyń ishinde olar ózi tańdaǵan baǵyt boıynsha ulttyq qolónerdiń negizgi tásilderin meńgerip, óz qolymen bir buıym jasap shyǵady. Bizdiń maqsatymyz – qolónerdiń túrlerin balalardyń sanasyna sińirip, olardyń qyzyǵýshylyǵyn arttyrý jáne bolashaqta osy ónerdi jalǵastyratyn jastardy tárbıeleý, – dedi ol.

Uıymdastyrýshylar «Ulttyq qolóner mektebin» aldaǵy ýaqytta jyl saıyn ótkizýdi josparlap otyr. Sondaı-aq jobaǵa ulttyq qolónerdiń basqa da baǵyttaryn qosyp, ony halyqaralyq deńgeıde tanytý kózdelgen.

– Ulttyq qolóner mektebi jyl saıyn ótedi dep josparlap otyrmyz. Qazaqstanda qolónerdiń túri óte kóp. Bolashaqta olardyń barlyǵyn birtindep qamtyp, damytqymyz keledi. Sonymen qatar basqa elderde de bizdiń ulttyq qolónerimizdi tanyp-bilse degen maqsatymyz bar. Úsh aptalyq oqý aıaqtalǵan soń qatysýshylarǵa arnaıy sertıfıkat beriledi. Balalardyń óz qolymen jasaǵan buıymdary osy jerde ótetin kórmege qoıylady. Ony elorda turǵyndary men qonaqtary, oqýshylar men olardyń synyptastary kelip tamashalaı alady, - dedi qor tóraǵasy.

Inklıýzıvti qysh óneri de oqytylady

«Ulttyq qolóner mektebi» jobasynyń úılestirýshisi Tańsholpan Jaýynbaıdyń aıtýynsha, jobaǵa balalar men jastar tarapynan qyzyǵýshylyq joǵary bolǵan.

– Ulttyq qolóner mektebi – Kreatıvti ındýstrııalardy damytý qorynyń bastamasymen júzege asyrylyp jatqan joba. Onyń basty maqsaty – ata-babadan mıras bolǵan ulttyq qolóner dástúrin jas urpaq arasynda keńinen dáripteý jáne bolashaq qolónershilerdiń jańa býynyn qalyptastyrý. Sarapshylar keńesiniń irikteýi nátıjesinde on sheber tańdaldy. Olar 27 shilde men 12 tamyz aralyǵynda Astanadaǵy Qazaq Creative Hub alańynda sabaq ótkizedi. Barlyq sabaq tegin uıymdastyrylady, - dedi ol.

Sonymen qatar joba úılestirýshisiniń aıtýynsha, baǵdarlamaǵa dástúrli qolóner túrlerimen birge erekshe bilim berý qajettiligi bar balalarǵa beıimdelgen ınklıýzıvti qysh óneri de engizilgen.

– Oqý sońynda ár qatysýshy tańdaǵan baǵyty boıynsha avtorlyq buıym daıyndaıdy. Balalardyń jumystary 12 tamyzda Qazaq Creative Hub alańynda ótetin qorytyndy kórmede kópshilikke usynylady. Joba aıasynda dástúrli qolónermen qatar erekshe bilim berý qajettiligi bar balalarǵa beıimdelgen ınklıýzıvti qysh óneri de oqytylady. Qazirgi ýaqytta joba tek Astana qalasynda júzege asyrylyp jatyr, - dedi

Qysh óneri balanyń sabyrly ári jınaqy bolýyna kómektesedi

Joba aıasyndaǵy baǵyttardyń biri – qysh óneri men keramıka. Bul sabaqtardy Oral qalasynan kelgen qysh óneriniń sheberi Nurbol Ámirjanov júrgizedi.

Sabaq barysynda balalar sazbalshyqtan qumyra, kese, músin jáne basqa da buıymdar jasaýdy úırenedi. Sheberdiń aıtýynsha, qysh óneri balanyń shyǵarmashylyq qabiletin damytýmen qatar, qol motorıkasyn jetildirýge, ózdiginen jumys isteýge jáne bastaǵan isin sońyna deıin jetkizýge úıretedi.

– Bul sabaqtarda balalar sazbalshyqtan túrli buıymdardy jasaýdy úırenedi. Negizgi maqsatymyz – olardy qysh ónerine baýlý ǵana emes, qol motorıkasyn, oılaý qabiletin, shyǵarmashylyq áleýetin jáne ózdiginen jumys isteý daǵdylaryn damytý. Bala bir buıymdy óz qolymen jasap shyqqan kezde onyń qyzyǵýshylyǵy men ózine degen senimi de arta túsedi, - dedi Nurbol Ámirjanov.

Onyń aıtýynsha, sazbalshyqpen jumys isteýdiń balanyń kóńil kúıine de áseri bar.

– Qysh óneri jaı ǵana buıym jasaýmen shektelmeıdi. Sazbalshyqtan adam men janýarlardyń músinderin, túrli sándik buıymdardy jasaýǵa bolady. Bul ónerdiń psıhologııalyq paıdasy da bar. Mysaly, tynymsyz, bir orynda otyra almaıtyn balalar qysh dóńgelegimen jumys isteı bastaǵanda birtindep sabyrlanyp, jumysyna den qoıady. Al tuıyq, kóp sóılemeıtin balalar kerisinshe ashylyp, erkin aralasa bastaıdy. Ásirese, erekshe bilim berý qajettiligi bar balalardyń kóńil kúıin kóterip, qol motorıkasyn damytýǵa oń áser etedi, - dedi sheber.

Mamannyń sózinshe, buıym daıyn bolǵanǵa deıin birneshe etaptan ótedi.

– Qysh óneri boıynsha sabaqtar úsh apta boıy aptasyna úsh ret ótedi. Ár sabaqqa on oqýshy qatysady. Balalardyń jasaǵan buıymdary birden daıyn bolmaıdy. Aldymen olar keptirilip, arnaıy mýfel peshinde kúıdiriledi. Keıin glazýr jaǵylyp, oıý-órnekpen bezendirilip, qaıtadan peshke salynady. Osy kezeńderdiń barlyǵynan ótken soń ǵana daıyn qysh buıym shyǵady, - dedi ol.

«Qolóner – mádenı mura ǵana emes, ata kásip»

Teri óńdeý sheberi Nurlan Jaqybaev ulttyq qolónerdiń mádenı mańyzymen qatar, onyń kásipke aınalatyn múmkindigine de toqtaldy. Onyń aıtýynsha, qolóner atadan balaǵa jalǵasyp kele jatqan mura bolǵanymen, qazirgi kezde ekonomıkanyń mańyzdy baǵyttarynyń biri retinde de damýy kerek.

– Qolóner – tek mádenı mura emes, ol ata kásip ári ekonomıkanyń mańyzdy salasy. Damyǵan memleketterde qolóner el ekonomıkasyna eleýli úles qosady. Sondyqtan búgingi sabaqtar balalardyń shyǵarmashylyq qabiletin damytyp qana qoımaı, bolashaqta óz kásibin qalyptastyrýyna da negiz bolady dep senemin, - dedi ol.

Sheber Kreatıvti ındýstrııalardy damytý qorynyń ulttyq qolónerdi damytýǵa qoldaý kórsetip otyrǵanyn atap ótti. Onyń pikirinshe, balalarǵa qolónerdi erte jastan úıretý olardyń shyǵarmashylyq qabiletin damytýǵa jáne bolashaqta óz isin bastaýyna múmkindik beredi.

Atadan balaǵa jalǵasqan kıiz óneri

Joba aıasynda kıiz basý, kórkem toqyma jáne shı toqý baǵyttary boıynsha da sabaq ótkiziledi. Osy ónerdiń qyr-syryn úıretetin sheberlerdiń biri – Jupar Beısenova.

Ol ulttyq qolónerdi zamanaýı turmyspen ushtastyryp, dástúrli tásilder arqyly túrli buıymdar jasap keledi. Kóp jyldan beri osy ónerdi shákirtterine úıretip, kıiz basý, kórkem toqyma jáne shı toqý dástúriniń jalǵasýyna úles qosyp júr.

– Búgin biz atadan balaǵa mıras bolyp kele jatqan ulttyq qolónerdi jańǵyrtyp, ony jas urpaqqa úıretý úshin bas qosyp otyrmyz. Bizdiń maqsatymyz – bilgenimizdi balalarǵa úıretip, ulttyq ónerdiń sabaqtastyǵyn jalǵastyrý. Kıiz basý, kórkem toqyma men shı toqý – halqymyzdyń ǵasyrlar boıy saqtalyp kelgen asyl murasy. Osy ónerdi jastar meńgerip, ári qaraı jalǵastyrsa, eńbegimizdiń aqtalǵany, – dedi Jupar Beısenova.

Ár qatysýshy óz buıymyn jasap shyǵady

Úsh aptalyq sabaq barysynda balalar tek sheberlerdiń jumysyn baqylap otyrmaıdy. Olar tańdaǵan baǵyty boıynsha materıaldarmen jumys istep, ár buıymnyń jasalý jolyn tájirıbe júzinde meńgeredi.

Oqý sońynda ár qatysýshy óz qolymen avtorlyq buıym daıyndaıdy. Daıyn jumystar 12 tamyzda ótetin qorytyndy kórmege qoıylady. Sondaı-aq qatysýshylarǵa «Ulttyq qolóner mektebiniń» kýrsyn aıaqtaǵany týraly sertıfıkat tabystalady.

Uıymdastyrýshylar bul jobany ulttyq qolónerdi úıretetin bir rettik kýrs retinde ǵana emes, balalardyń dástúrli ónerge degen qyzyǵýshylyǵyn oıatyp, bolashaqta osy salany jalǵastyrýyna múmkindik beretin bastama retinde qarastyryp otyr.