Elordada úlken shirkeýdiń tasy qalandy
QR Aqparat jáne qoǵamdyq damý mınıstri Dáýren Abaevtyń aıtýynsha, búginde orystyń pravoslavıe shirkeýi elimizdegi dinaralyq kelisimdi kúsheıtýge óz úlesin qosyp keledi.
«Ult basshysy Nursultan Nazarbaev bir mańyzdy máseleni únemi aıtyp otyrady. Islam men pravoslavıe - bul ortaq úıimizdegi rýhanı kelisimniń eki tiregi. Qazaqstan qashanda dinder men mádenıetterdiń ortaq úıi bolǵan. Bizdiń jerimizde san alýan etnostardyń ókilderi birlik pen tatýlyqta turady. Olardyń barlyǵy ózderiniń dinı rásimderin ótkizip, ǵıbadathanalaryn sala alady. Al Qazaqstandaǵy orystyń pravoslavıe shirkeýi talaı jyldar boıy qoǵamnyń rýhanı qundylyqtaryn kúsheıtýge óz úlesin qosyp, dinaralyq kelisimdi nasıhattaýda memlekettiń senimdi serigi bolyp keledi», - dedi D.Abaev saltanatty sharada.
Qazaqstan mıtropolıti Aleksandrdyń sózine qaraǵanda, qazirgi kezde shirkeýdiń jobasy jasalyp jatyr. Al ǵımarattyń qurylysy aldaǵy úsh jylda aıaqtalady.
«Qala turǵyndary birneshe jyl boıy Úkimetke de, Prezıdentke de hat jazyp, Esildiń sol jaǵalaýynda taǵy bir shirkeýdiń qurylysyn bastaýdy suraǵan. Men de ótinish jasadym. Sóıtip, QR Tuńǵysh Prezıdenti - Elbasy Nursultan Ábishuly Nazarbaev resmı túrde ruqsat berdi. Jaqynda Ult kóbasshysy elordada Ortalyq Azııadaǵy eń úlken meshittiń tasyn qalaǵan bolatyn. Ol jerde bir ýaqytta 30 myń adam namaz oqı alady. Biz de pravoslavıe hrıstıandary sany jaǵynan ekinshi dinı qaýymdastyq retinde qudaı úıin salýǵa múmkindik aldyq», - dep atap kórsetti mıtropolıt.
Aıta keteıik, jańa shirkeý Syǵanaq kóshesiniń boıymen Jaǵalaý turǵyn úıine jaqyn jerdegi kóldiń jaǵasynda ornalasady.
