Elordada úleskerlik qurylys nysandaryn salýshylarǵa talap kúsheıtildi
ASTANA. QazAqparat - Elorda ákimdiginde Astana qalasy ákiminiń birinshi orynbasary Sergeı Horoshýnnyń tóraǵalyǵymen qurylysy aıaqtalmaǵan turǵyn úılerde zańsyz baspanalardy satýdyń aldyn alýǵa baǵyttalǵan keńeıtilgen otyrys ótti.
Jınalys jumysyna Astana qalasynyń sáýlet jáne qala qurylysy basqarmasynyń, turǵyn úı qurylysyna kepil berý qorynyń jáne 200-ge jýyq qurylys kompanııalarynyń mamandary qatysty.
Taraptar baspanalardy berý boıynsha zańsyz jarnamalarǵa qatysty, turǵyn úı qurylysyna úleskerlik qatysý týraly zańynda qarastyrylǵan jaýapkershilikti buzý, úleskerlik qatysý salasynda zań buzǵandarǵa qatysty ókiletti ogandar qoldanatyn jaza týraly birneshe ózekti máseleler talqylady.
- Biz sizdermen birneshe ret úleskerlikpen qatysý týraly Zańyn saqtaýdy talqyladyq. Alaıda keıbir kompanııalar bizdiń usynystarymyzdy elemedi, sol sebepti azamattardyń quqyǵyn buzýǵa qatysty birneshe iri qylmystyq is qozǵalǵan. Biz úleskerlik qurylys týraly jańa Zańdy saqtaýdy qatań eskerttik. Salýshylardyń jartysy osy ýaqytqa deıin úıdi salyp, páterlerdi taratyp úlgerdi. Biz bul protsessterdi joǵarydaǵy basshylarmen kelisip iske asyrýǵa múmkindik berdik. Qurylysshylarǵa jańa zańnyń talabyna saı bastaǵan qurylystaryn ústimizdegi jyldyń 1 shildesine deıin bitirýge múmkindik berdik. Sondaı-aq, ınvestorlar qarjysyn tartý boıynsha kez kelgen jarnamaǵa jol bermeımiz. Alaıda búgingi kúni 20-dan astam qurylys kompanııasy Zań talaptaryn oryndamaǵan, sol sebepti olarǵa qatysty qylmystyq iz qozǵaldy, - dep basa aıtty qurylys kompanııalarynyń ókilderine Astana qalasy ákiminiń orynbasary Sergeı Horoshýn.
Budan bólek, salýshylarǵa turǵyn úıler qurylysyna azamattar aqshasyn tartý mehanızmi boıynsha úleskerlik qatysý zańynyń normalary túsindirildi.
Esterińizge salaıyq, 2016 jyldyń 10 qazanynda turǵyn úı qurlysynda «Úleskerlik qatysý týraly» jańa Zań kúshine endi. Soǵan sáıkes ákimdiktiń ruqsatynsyz nemese kepildik kelisimshartynsyz qurylysqa qarajat tartýǵa jol berilmeıdi.
Osy rette Zańnyń qoldanysqa engizilýi kezinde birde-bir úleskerlikqatysý týraly resmı kelisimshart jasalmaǵan.
Sonymen qosa, «Úleskerlik qatysý týraly» Zańnyń talaptaryn saqtamaı azamattyq-quqyqtyq kelisim jasalǵan.
-2016 jyldyń qazanyna deıin úleskerler tartylǵan qurylys nysandarynyń jumysyn aıaqtaý maqsatynda kúzde Úkimet bul suraqty qarastyrǵan bolatyn. Onda salýshylarǵa 2017 jyldyń 1 shildesine deıin aıaqtaýǵa múmkindik berý týraly sheshim qabyldanǵan edi. Sol kezde júrgizilgen tekseristiń nátıjesinde qoldanystaǵy Zań negizinde turǵyndar qarajatyn zamattyq-quqyqtyq kelisim jolymen alǵan elorda tóńireginde 49 nysan salýshy anyqtalǵan bolatyn. Alaıda bul salýshylar ákimdiktiń ruqsatynsyz ary qaraı da azamattardyń qarajatyn tarta berý quqyǵy bar degen sóz emes edi, - deıdi Astana qalasynyń sáýlet jáne qala qurylysy basqarmasy basshysynyń orynbasary.
Tek sońǵy aptanyń qorytyndysy boıynsha 23 nysanda páterlerdi satý boıynsha zańsyz jarnama júrgizilgeni anyqtaldy. Bular boıynsha materıaldar salýshylarǵa qatysty shara qoldaný úshin Astananyń ishki ister departamenti men memlekettik kiris departamentine jiberilgen.
Kórsetilgen kompanııalardy qylmystyq jaýapkershilikke tartý prokýratýra organdarynyń qadaǵalaýyna alyndy.
Jınalys qortyndysy boıynsha zań buzýshylyqtarǵa jol bermes úshin qurylys kompanııalaryna jaýapty vedomstvo mamandarynan naqty usynystar berildi.
