Elordada Ularbek Nurǵalymulynyń «Daıaǵashshy» kitaby tanystyryldy
Atalǵan is-sharaǵa Qazaq ulttyq óner ýnıversıtetiniń professory Nazıra Muqysheva, belgili ǵalym Sherýbaı Qurmanbaıuly, jazýshy Kádirbek Qunypııauly, Dáýletkereı Kápuly, Serikzat Dúısenǵazy sekildi belgili aqyn-jazýshylar qatysyp, Ularbek Nurǵalymulynyń shyǵarmashylyǵy týraly qundy pikirlerimen bólisti.
«Jalpy, Ularbek Nurǵalymulynyń shyǵarmashylyǵy týraly osyǵan deıin de túrli BAQ-ta jarııalanǵan týyndylarynan tanyp, bilip júrmiz. Biz, aqyn-jazýshylar jasyratyny joq, ózimizden keıingi býynnyń shyǵarmashylyǵyndaǵy jańalyqtardy keshirek ańǵaryp, sırek oqımyz. Men de sol «dástúrge» baǵynyp júrsem de, Ularbektiń jazǵandaryna nazar aýdaryp, izdep oqımyn. Onyń «Daıaǵashshy», «Sóz tapqanǵa qolqanyń qandaı qatysy bar?», «Qazaq ándi qalaı tyńdaǵan?» sııaqty kóptegen tanymdyq maqalalary meniń kóńilimnen shyqty. Munda qazaqtyń shynaıy turmys-salty, mádenıeti, tirshilik daǵdysy anyq sýretteledi. Qazaqtyń azamaty retinde kóshpeli ómirdi basynan keshe otyryp, shyǵarmasynda ony tereń tolǵap, shynaıy sezinip jazǵan. Onyń búgingi qazaq qoǵamyndaǵy máni men mańyzyn, úlgisi men ónegesin salmaqtap, tarazylap, oqyrmanǵa túsinikti tilmen jetkize bilgen. Sondyqtan, bul kitabyn oqyrman izdep júrip oqıtyn kitap dep baǵalaımyn», - dedi fılologııa ǵylymdarynyń doktory, professor Sherýbaı Qurmanbaıuly.
Aqyn, synshy, «Rýh» halyqaralyq ádebı baıqaýynyń júldegeri Ularbek Nurǵalymulynyń «Daıaǵashshy» kitabyna qazaqy naqyshqa qanyq esse, áńgime jáne maqalalary toptastyrylǵan. Qalamger shyǵarmalarynyń bárinde derlik ulttyq bolmystyń ustyndy sıpattaryn sóz etedi. Bul kitapqa «Aıtýǵa bolmaıdy», «Atajurtqa kelýim bir hıkaıa», «Jurtbaevtaǵy jurnaq», «Sóz tapqanǵa qolqanyń qandaı qatysy bar?», «Abaı aıtqan ólmeıtuǵyn sóz», «Qazaq ándi qalaı tyńdaǵan?», «Qyran men qazaq», «Qaıǵynyń emi nemese Kekilbaevqa kóńilqos aıtý», taǵy basqa shyǵarmalary engen.
Esterińizge sala keteıik, «Eurasian Book Fair» - eýrazııalyq halyqaralyq kitap kórme-jármeńkesi elimizdegi iskerlik jáne gýmanıtarlyq áriptestikti damytý jáne nyǵaıtý maqsatynda TMD, Eýropa jáne Azııa elderiniń baspa, kitap saýdasy uıymdaryn, mádenı jáne bilim berý ortalyqtaryn úlken zııatkerlik alańǵa biriktiretin asa iri kitap forýmy.
Bul kórmege 13 memleketten kelgen 90 kompanııa qatysýda. Onyń ishinde Reseı, Ázerbaıjan, Tájikstan, Armenııa, Qyrǵyzstan, Túrkııa, Qytaı, Iran, Polsha, Belgııa, Latvııa, Ýkraına, Ózbekstan bar.
Jastar jyly aıasynda jas avtorlardyń qatysýymen «Ashyq áńgime» aqyndyq marafony, kitap týraly áńgimelesý (book talks), ádebıet klýbynyń otyrysy, «Kitapty qalaı tıimdi oqý kerek?» taqyrybyna arnalǵan sheberlik synyptary, tanymal aqyn-jazýshylarmen avtograf-sessııalary uıymdastyrylyp jatyr.
