Elordada UQShU memleketaralyq komıssııasynyń otyrysy ótip jatyr

ASTANA. KAZINFORM – Elordada Ujymdyq qaýipsizdik týraly shart uıymyna múshe memleketterdiń áskerı-ekonomıkalyq yntymaqtastyq jónindegi memleketaralyq komıssııasynyń 23-otyrysy ótip jatyr.

- Bizdiń áskerı-ekonomıkalyq saladaǵy ózara is-qımylymyz ujymdyq qaýipsizdikti qamtamasyz etýdiń jáne elderimizdiń qorǵanys-ónerkásip áleýetin nyǵaıtýdyń mańyzdy elementi sanalady. Otyrystyń ár qatysýshysynyń úlesin joǵary baǵalaımyz, - dedi jıyndy ashqan Qazaqstan Qorǵanys mınıstriniń orynbasary Shaıh-Hasan Jazyqbaev.

RF Úkimeti tóraǵasynyń birinshi orynbasary Denıs Mantýrov búgingi is-sharany joǵary deńgeıde uıymdastyrǵan Qazaqstan tarapyna rızashylyǵyn bildirdi.

- Kún tártibinde naqty ózara is-qımyldy damytýdy qajet etetin kóptegen másele bar. Aıtap aıtqanda, memleketterimizdiń qorǵanys kásiporyndary úshin kadrlar daıyndaý jaıynda sóz bolyp otyr. Bul rette ǵylymı bilim berý mekemeleriniń seriktestigin qalyptastyryp, jeńildik sharttarymen stýdentterdi oqytý tetikterin jeńildetý asa mańyzdy. Bul baǵyttaǵy birlesken jumys ádisteri jeke kelisimde kózdelgen. Onyń jobasy búgin komıssııa talqylaýyna shyǵarylyp otyr. Injenerlik jáne syrtqy ekonomıkalyq beıin quziretterin teńgerimdi kúsheıtý UQShU memleketteriniń qorǵanys ónerkásipteriniń damý qarqynyn úılestirý úshin aıryqsha mańyzǵa ıe. Áskerı maqsattaǵy ónimderdi shyǵarý, olardy jańǵyrtý jáne jóndeý boıynsha ǵylymı-óndiristik kooperatsııany keńeıtý soǵan baılanysty, - dedi ol.

Sonymen qatar ol UQShU-ǵa múshe memleketter arasyndaǵy dıalog pen quziretter alys-berisiniń jańa formatyn damytý qajettigin aıtty.

- Osyǵan oraı kongress-kórme is-sharalaryn ótkizý tájirıbesin yntalandyrý jón bolar edi. Bul turǵyda kelesi jyldyń maýsymynda Mınskide «Ulttyq qaýipsizdik. Belarýs-2026» halyqaralyq kórmesiniń iskerlik baǵdarlamasy aıasynda UQShU-nyń 2-shi áskerı-ekonomıkalyq konferentsııasyn uıymdastyrý bastamasyn qoldaımyz, - dedi Denıs Mantýrov.