Elordada úkimettik emes uıymdardy qoldaý ortalyǵynyń keńsesi ashyldy

NUR-SULTAN. QazAqparat - Búgin elorda ákiminiń orynbasary Baqtııar Máken Nur-Sultan qalasy azamattyq bastamalar ortalyǵynyń jańa keńsesiniń jumysymen tanysty. Ortalyq Qoǵamdyq damý isteri basqarmasynyń qoldaýymen memlekettik áleýmettik tapsyrys aıasynda quryldy, dep habarlaıdy qala ákimdiginiń resmı saıty.

Atalmysh jobany «KAMEDA» qoǵamdyq qory iske asyrdy. Ortalyqtyń aýmaǵy 300 sharshy metrdi quraıdy. Onda trenıng zaly, sheberlik-klasstarǵa arnalǵan bólme, ÚEU ókilderi úshin jumys kabınetteri bar. Qoǵamdyq birlestikter úshin óteýsiz negizde áleýmettik is-sharalarótkizýge zal usynylady. Ortalyqtyń basty mindeti – azamattyq bastamalardy, áleýmettik baǵdarlanǵan kommertsııalyq emes uıymdar jumysyn qoldaý. Atalmysh mekemede qoǵamdyq uıymdardyń ókilderine ádistemelik, konsýltatsııalyq kómek kórsetiletin bolady.

Ortalyq elordalyq ÚEU ókilderi tarapynan túsetin ótinimder sanyn arttyrýdy kózdeıdi. Sondaı-aq mekeme úkimettik emes uıymdarǵa jobalardy qarjylandyrý men rásimdeýge qoldaý kórsetý úshin granttar men memlekettik áleýmettik tapsyrysty alýǵa járdemdesedi.

Ortalyqty aralaý kezinde Baqtııar Máken úkimettik emes uıymdardy damytý úshin jaǵdaı jasaýdyń mańyzdy ekendigin atap ótti.

«Ortalyq úkimettik emes uıymdardyń damýy men nyǵaıýyna yqpal etedi. Bul óz kezeginde, elorda turǵyndaryn qoǵamnyń áleýmettik mańyzdy máselelerine beı-jaı qaramaýyna alyp keledi. Qala ákiminiń tapsyrmasyna boıynsha jyl saıyn biz ózekti jobalardyń sany men memlekettik áleýmettik tapsyrysty qarjylandyrý kólemin ulǵaıtatyn bolamyz», - dedi ákim orynbasary.