Elordada tutynýshylardyń qoǵamdyq birlestikteriniń ókilderi marapattaldy

NUR-SULTAN. QazAqparat – Búgin elordada QR Saýda jáne ıntegratsııa mınıstrliginde Dúnıejúzi tutynýshylarynyń quqyqtaryn qorǵaý kúni aıasynda tutynýshylardyń qoǵamdyq birlestikteriniń ókilderin saltanatty marapattaý rásimi ótti, dep habarlaıdy QazAqparat tilshisi.

Osy oraıda tutyný quqyqtaryn qorǵaý salasyn damytýǵa qosqan eleýli úlesi úshin nagradalar tabystaldy.

«Ótken jyly vedomstvoǵa 30 myńǵa jýyq azamat júgingen. Biz 10000-ǵa jýyq adamnyń buzylǵan tutynýshylyq quqyqtaryn qalpyna keltirýge kómektestik, sondaı-aq shamamen 10000 azamatqa zańnama normalary boıynsha túsinikteme berdik. Qabyldanǵan sharalar qazaqstandyqtarǵa 249 mln teńgeni qaıtarýǵa múmkindik berdi», - dedi Saýda jáne ıntegratsııa vıtse-mınıstri Erjan Qazanbaev.

Sonymen qatar ol úkimettik emes sektordyń tutynýshylardyń quqyqtaryn qorǵaýdaǵy mańyzdy róli týraly atap ótti. Ókiletti organ tarapynan qoǵamdyq birlestiktermen tyǵyz ózara is-qımyl ornatý boıynsha sharalar qabyldanyp jatyr.

Aıta keteıik, elimizde osy salada 50-den astam qoǵamdyq birlestik jumys isteıdi. Memlekettik organdarmen birlesip, mınıstrlikter men ákimdikter janyndaǵy konsýltatıvtik-keńesshi organdardyń quramyna tutynýshylardyń quqyqtaryn qorǵaý salasyndaǵy qoǵamdyq birlestikterdi qosý boıynsha jumys júrgizilip otyr.

Erjan Qazanbaev atalǵan uıymdar ókilderin Dúnıejúzilik tutynýshylardyń quqyqtaryn qorǵaý kúnimen quttyqtap, qoǵamdyq birlestikterdiń ókilderine alǵys hattar tabys etti. Saltanatty is-sharada olardyń tutynýshylyq quqyqtary men azamattardyń ál-aýqatyn qorǵaý jónindegi kúndelikti praktıkadaǵy qajyrly, adal jumysy atap ótildi.