Elordada tutqyndalǵan Shý qalasy turǵyndarynan 8 keliden astam gashısh tárkilendi

Bul týraly Astana qalalyq ІІD til saıasaty jáne aqparat bóliminiń bastyǵy Nurdildá Oral málim etti.

Onyń aıtýyna qaraǵanda, aǵymdaǵy jyly aqpannyń 9-ynda qalalyq ІІD Esirtki bıznesimen kúres basqarmasynyń qyzmetkerleriniń jedel izdestirý is-sharalary barysynda Astanaǵa esirtki zattaryn saýdalaý maqsatynda kelgen Jambyl oblysy Shý qalasynyń 37 jáne 33 jastaǵy eki azamaty ustalǵan.

"Ustalǵan azamattardyń turyp jatqan jerlerin tekserý barysynda 8,5 keli gashısh tabylyp, tárkilendi. Qazirgi ýaqytta QR QK 259 baby boıynsha qylmystyq is qozǵaldy. Atalǵan bapta múlkin tárkileý arqyly 12 jylǵa bas bostandyǵynan aıyrý jazasy qarastyrylǵan", dedi ol.

Jyl basynan beri "Rýbej" beketterinde esirtki zattaryn tasymaldaýǵa qatysty 14 is qozǵalyp, 3 azamat - qylmystyq, al 11-i ákimshilik jaýapkershilikke tartylsa, aınalymnan 49 keliden astam esirtki zattary tárkilengen.