Elordada tútinge tunshyqqan 5 adam qutqaryldy
NUR-SULTAN. QazAqparat - Elordada órtten qutqarýdyń kezekti oqıǵasy oryn aldy. Páterlerdiń kireberisindegi qalyń tútin arasynan 5 adam qutqaryldy, onyń bireýi bala, dep habarlaıdy QazAqparat qalalyq TJD baspasóz qyzmetine silteme jasap.
28 qazanda 13 saǵat 13 mınýtta «101» pýltine Abylaı han kóshesindegi órt týraly habarlama túsken. Órt sóndirý bólimsheleri 6 mınýttan keıin oqıǵa ornyna kelip jetkende, aýmaǵy 10 sharshy metrdi qamtyǵan on qabatty turǵyn úıdiń 9-qabatyndaǵy páterdiń qonaq bólmesinde jıhazdar janyp jatqan.
«Kireberis qatty tútindep, saldarynan adamdardyń ómirine qaýip tóndi. Turǵyndardy evakýatsııalaýdy gaz- tútinnen qorǵaý qyzmetiniń mamandary uıymdastyrdy. 10-ÓSB órt sóndirýshileriniń jedel áreket etýi men úılesimdi is-qımyldary, sondaı-aq órt bolǵan orynda sapaly barlaý jumysyn júrgizý men sheshýshi baǵytty durys anyqtaı bilýi arqasynda 5 adam qutqaryldy, onyń 1-i bala. Órt 13 saǵat 31 mınýtta aýyzdyqtalyp, órttiń ary qaraı taralýyna jol berilmedi. Órtti sóndirýge jeke quramnan 17 adam jáne 4 tehnıka jumyldyryldy. Órtti sóndirý barysynda gazdan jeńil ýlanǵan áıel adam aýrýhanaǵa jetkizildi»,- delingen habarlamada.
