Elordada Túrkııanyń 95 jyldyǵyna oraı saltanatty qabyldaý ótkizildi
Jyl saıyn Túrkııada Respýblıka kúni 29 qazanda atalyp ótedi. Respýblıkanyń 95 jyldyǵyna oraı Túrkııa elshiligi meımandarǵa arnaıy qabyldaý ótkizdi. Saltanatty is-sharaǵa elimizdiń laýazymdy tulǵalary men qoǵam qaıratkerleri, Qazaqstandaǵy sheteldik elshilikterdiń ókilderi qatysty.
Jıynda Túrkııanyń Qazaqstan Respýblıkasyndaǵy Tótenshe jáne Ókiletti Elshisi Nevzat Ýıanyk Túrkııa prezıdenti Rejep Taıyp Erdoǵannyń hatyn oqyp berdi.
«Elimizdiń turǵyndaryn jəne shet memleketterde ómir súrip jatqan otandastarymyzdy, bul kúndi bizben birge maqtanysh etetin barsha dostarymyzdy 29 qazanda atalyp ótetin Respýblıka kúnimen quttyqtaımyn. Respýblıkamyzdyń 95 jyldyǵy atalyp ótip jatqan osy kúni Azattyq soǵysynda bizdi jeńiske jetkizip, jańa memleket qurý jolynda kúresken Mustafa Kemal Atatúrikten bastap barsha qaharmandarymyzdy rızashylyqpen jəne qurmetpen eske alamyn», - delingen Túrkııa prezıdentiniń hatynda.
Nevzat Ýıanyk óz sózinde qýanyshty bólisýge kelip otyrǵan barlyq meımanǵa alǵysyn bildirdi.
Óz kezeginde keshte qonaq bolǵan QR Investıtsııalar jəne damý mınıstri Jeńis Qasymbek Qazaqstan halqy men Úkimeti atynan baýyrlas eldiń mereıli kúnimen quttyqtady.
«Bizdiń dıplomatııalyq qatynasymyzdyń ornaǵanyna 30 jylǵa taıap qaldy. Baýyrlas Túrkııanyń bizdiń Təýelsizdigimizdi birinshi bolyp tanyǵany ərqashan Qazaqstan halqynyń esinde. Qazaqstan menTúrkııa arasyndaǵy strategııalyq əriptestik, rýhanı dostyq nyǵaıyp keledi», - dedi Jeńis Qasymbek.
Saltanatty qabyldaýdyń sońy merekelik sıpatta órbip, óner ıeleri meımandarǵa ənnen shashý shashty.
