Elordada Túrkııaǵa baratyn eriktiler toby jasaqtalyp jatqany týraly aqparat - jalǵan

ASTANA. QazAqparat – Áleýmettik jelide elordanyń tótenshe jaǵdaılar departamenti Túrkııaǵa kómek kórsetýge jiberý úshin eriktiler jınap jatyr degen aqparat tarady, dep habarlaıdy QazAqparat tilshisi.

«Astana qalasynyń TJD kezekshilik bóliminde jer silkinisi saldary aýmaǵyna jóneltý úshin eriktiler jınalýda. Astana qalasy, Beıbitshilik kóshesi 22. Azamattar ishinen birinshi bolyp jazyldym. Áriptesterden qońyraý kútemin», dep jazdy Nurǵalı Ǵabıt esimdi azamat Facebook paraqshasynda.

Osyǵan oraı Astana qalalyq TJD resmı málimdeme jasady.

Vedomstvonyń Facebook paraqshasynda jarııalanǵan málimdemede: «Astana qalasynyń tótenshe jaǵdaılar departamentine Túrkııa eline kómek kórsetýge jiberýge elordalyq TJD eriktilerdi jınap jatyr degen aqparat kelip túsýde. Óz kezeginde, bul aqparat shyndyqqa sáıkes kelmeıtinin habarlaımyz! Búgingi tańda qajetti qutqarý jabdyqtarymen jabdyqtalǵan 40 qazaqstandyq qutqarýshy Túrkııada, Gazıantep qalasynda. Sondaı-aq tájirıbeli mamandar, kınologtar, Apattar medıtsınasy ortalyǵynyń dárigerleri qatarynan qosymsha 60 qutqarýshy búgin joıqyn jer silkinisiniń zardaptaryn joıýǵa kómek kórsetýge bara jatyr. Osyǵan baılanysty azamattardan tek resmı derekkózderge senýdi suraımyz», - delingen.