Elordada turǵyn úı qurylysyna úlestik qatysý týraly zańdy buzǵan 4 kompanııa áshkerelendi
ASTANA. QazAqparat - Turǵyn úı qurylysyna úlestik qatysý Astanada baspana alam deýshiler úshin jaqsy múmkindik. Biraq adamdar bolashaq páterdiń qurylysyna aqshalaryn jumsamas buryn salýshy kompanııany tańdaýǵa muqııat kóńil bólýge tıis, dep habarlady astana.kz.
Sondaı-aq, úlesker qurylys kompanııasynyń Turǵyn úı keshenderin salýǵa úleskerlerdiń aqshasyn tartýǵa ruqsat beretin qujattarynyń bolýyn jáne olardyń zańnamaǵa sáıkestigin tekserý kerek. Salýshynyń mindetti túrde myna qujattary bolýy shart: 1. jer ýchaskesin tańdaý jáne kelisý aktisi 2. jobalaý týraly qaýly 3. sáýlettik-jobalaý tapsyrmasy 4. Astana qalasynyń sáýletshisi bekitken eskızdik joba 5. ınjenerlik jelilermen jumys jobasynyń memlekettik saraptamasy 6. qurylys júrgizý týraly qaýly Azamattar turǵyn úı qurylysyna úlestik qatysý úshin qurylys kompanııasyn tańdaǵanda asa saq bolýy kerek. Búginde buqaralyq aqparat quraldarynda páterler satylatyny týraly habarlandyrý bergen tórt qurylys kompanııasy anyqtaldy. Atap aıtqanda, «Star Dast» JShS (Anısa TK, «Anısa-2» TK), Djamanbekova Oksana Alekseevna atynan áreket etetin kompanııa («Kóktal-2» TK), «Halyqaralyq ınvestıtsııalyq-ınnovatsııalyq kompanııa» JShS («Telman» TK), «KazJordan construction company» JShS («Stolıchnyı-2» TK). Bul kompanııalar Turǵyn úı qurylysyna úlestik qatysý týraly zańdy belinen basyp, qurylys júrgizýge ruqsat beretin qujattar tizimin tolyq jınamaǵan. Kompanııalardyń kóppáterli turǵyn úı keshenderin salýǵa mynadaı ruqsat qujattary joq: - Memlekettik saraptama qorytyndysy; - Qurylys júrgizý týraly qaýly: - Turǵyn úı keshenderin salýǵa úleskerlerdiń aqshasyn tartýǵa quqyq beretin lıtsenzııa. «Halyqaralyq ınvestıtsııalyq-ınnovatsııalyq kompanııa» JShS («Telman» TK) tekserý men izdeý jumystaryn júrgizý jáne jobalaý týraly kelisim; sáýlettik-josparlaý tapsyrmasyn (SJT), belgilengen eskızdik jobasyn jasamaǵan. Atalǵan turǵyn úı qurylys kompanııalarynyń jumysy Astanada Turǵyn úı qurylysyna úleskerlik qatysý máseleleri jónindegi vedomstvoaralyq komıssııanyń apta saıynǵy otyrysynda qaraldy. Otyrys qorytyndysy boıynsha barlyq materıaldardy QR zańnamasynda belgilengen tártipte tıisti sheshim qabyldaý úshin Astana qalasynyń Іshki ister departamentine joldaý týraly sheshim qabyldandy. Eger salýshy kompanııa salynyp bitpegen nysandarda turǵyn úı aýdandaryn satsa, onyń joǵaryda atalǵan qujattardan basqa, úleskerlerdiń qarjysyn tartýǵa ruqsaty bolýy kerek.
