Elordada turǵyndardy aldap, 13 mln teńgeni qaltaǵa basqan kúdikti ustaldy

ASTANA. KAZINFORM – Astanada polıtseıler tıimdi nesıe rásimdeýge kómektsemin dep birneshe adamnan iri kólemde aqsha jymqyrǵan áıeldi ustady. Bul týraly Іshki ister mınıstrliginiń baspasóz qyzmeti habarlady. 

Tergeý málimetine súıensek, kúdikti birneshe adamnyń senimine kirip, memlekettik qoldaý baǵdarlamasy aıasynda nesıe áperemin dep sendirgen. Sol maqsatta aldyn ala tólem túrinde aqsha jınap otyrǵan.

Alaıda nesıe de, ýáde etilgen qyzmet te kórsetilmegen. Jymqyrǵan qarajattyń jalpy somasy 13 mln teńgeni quraıdy. Azamattardyń senimin arttyrý úshin kúdikti jalǵan keńse jaldap, ózin «banktegi senimdi menedjerlermen jumys isteıtin deldal» retinde tanystyrǵan. Tipti keıbirine jalǵan qyzmettik kýálik te kórsetken.

Qazirgi ýaqytta oǵan qatysty qylmystyq is qozǵaldy. Polıtseıler azamattardy alaıaqtardan saq bolýǵa shaqyrady.

Buǵan deıin Abaı oblysynda kóshi-qon tártibin buzǵan 137 sheteldik elden shyǵarylǵanyn jazǵan edik.