Elordada turǵyn úıdegi kirpish qaptamasynyń opyrylýy: polıtsııa qurylys qujattaryn tekserip jatyr

ASTANA. KAZINFORM — Polıtsııa elordada turǵyn úı kesheniniń qasbetindegi kirpish qaptamasynyń qulaýy oqıǵasy boıynsha osy nysanynyń qurylysyna qatysty qujattardy tekserip jatyr. Bul týraly Іshki ister mınıstriniń orynbasary Sanjar Ádilov málim etti.

Onyń aıtýynsha, bul jaǵdaı Qylmystyq kodekstiń 306-baby (qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý) boıynsha tergelip jatyr.

— Ákimdikpen birlese tergeý aıasynda komıssııa quryldy. Biz keshendi sot-medıtsınalyq ári qurylys saraptamasyn taǵaıyndadyq. Tergeý nátıjesinde birneshe ret sapasyz jumys júrgizgen qurylys salýshyǵa quqyqtyq baǵa beremiz. Osy sapasyz jumystardyń saldarynan elorda turǵyndarynyń densaýlyǵynan zalal keltirildi. Qazir tergeý amaldary júrip jatyr jáne naqty adamdar kúdikti dep tanylǵan joq, — dedi S. Ádilov Senatta tilshiler suraǵyna jaýap bere otyryp.

Onyń aıtýynsha, polıtseıler turǵyn úıdiń syrtyn qaptaý kezinde paıdalanylǵan qurylys qujattaryn alyp, tekserip jatyr.

— Sondyqtan kúdiktini anyqtaý týraly quqyqtyq baǵa berý úshin egjeı-tegjeıli tekserý kerek. Bul turǵyda ákimdiktiń tıisti qorytyndylary men sot saraptamalaryn alý qajet, — dedi ol.

Esterińizge sala ketsek, 8 qarashada elordada turǵyn úı kesheniniń qasbetindegi kirpish qaptamasy men kondıtsıoner qondyrǵysynyń bóligi qulap, saldarynan 5 adam zardap shekti.
Zardap shekkenderdiń bári № 1 kópsalaly aýrýhanaǵa jetkizildi. 

Jaqynda Densaýlyq saqtaý vıtse-mınıstri Tımýr Muratov elordada turǵyn úı kesheniniń qasbetindegi kirpish qaptamasy men kondıtsıoner qondyrǵysynyń bóligi qulaý saldarynan zardap shekken feldsherdiń jaǵdaıy týraly aıtty.