Elordada turǵyn úı qasbetiniń kirpish qaptamasy qulap, jaraqat alǵan feldsher kóz jumdy

ASTANA. KAZINFORM — Elordada turǵyn úı qasbetiniń kirpish qaptamasy qulap, jaraqat alǵan feldsher Uldana Myrzýan kóz jumdy. Bul aqparatty Astana qalalyq qoǵamdyq densaýlyq saqtaý basqarmasy rastady.

— 18 qarashada óziniń kásibı mindetterin oryndaý kezinde aýyr jaraqat alǵan feldsher — áriptesimiz qaıtys bolǵanyn qaıǵyra aıtamyz. Turǵyn úı kesheniniń syrtqy kirpish qaptamasynyń bir bóligi qulaǵan kezde zardap shekkenderge medıtsınalyq kómek kórsete otyryp, ózi de aýyr jaraqat alyp, óte aýyr jaǵdaıda aýrýhanaǵa jetkizildi, — dep jazdy Astana qalalyq qoǵamdyq densaýlyq saqtaý basqarmasynyń basshysy Álııa Rústemova Instagram paraqshasynda.

Vedomstvo málimetinshe, 8 qarashadan beri jansaqtaý bóliminde óte aýyr jaǵdaıda bolǵan patsıentke barlyq qajetti medıtsınalyq kómek kórsetilgen. Alaıda, naýqas tym aýyr jaraqat alǵandyqtan qaıtys boldy. 

— Qoǵamdyq densaýlyq saqtaý basqarmasy jáne barlyq medıtsınalyq qaýymdastyq marqumnyń týǵan-týystary men jaqyndaryna shyn júrekten kóńil aıtady. Qaıǵyǵa ortaqtasyp, aýyr qazaǵa kóńil bildiredi, — dedi basqarmadan.

Esterińizge sala ketsek, 8 qarashada elordada turǵyn úı kesheniniń qasbetindegi kirpish qaptamasy men kondıtsıoner qondyrǵysynyń bóligi qulap, saldarynan 5 adam zardap shekti. Zardap shekkenderdiń bári № 1 kópsalaly aýrýhanaǵa jetkizildi.

11 qarashada ótken Úkimet otyrysynyń qorytyndysyna arnalǵan brıfıngte Densaýlyq saqtaý vıtse-mınıstri Tımýr feldsherdiń jaǵdaıy óte aýyr ekenin aıtqan bolatyn.