Elordada tuńǵysh jýrnalıster alleıasy paıda boldy
NUR-SULTAN. QazAqparat - Aqparat salasy qyzmetkerleriniń kásibı merekesi qarsańynda Nur-Sultan qalasynda jýrnalısterge arnalǵan alleıa ashyldy, dep habarlaıdy QazAqparat tilshisi.
Qazaqstan qurylysshylar odaǵy muryndyq bolǵan sharaǵa 14 BAQ-tan 40- tan astam jýrnalıst qatysty. Olar óz qoldarymen alleıanyń alǵashqy kóshetterin egip, aýmaqtyń jalpy josparymen tanysty.
Qurylysshylar odaǵynyń tóraǵasy Talǵat Erǵalıevtiń aıtýynsha, bul alleıa BAQ ókilderiniń eshqandaı akkredıtteýsiz, erkin kirip, pikir almasatyn jasyl buryshyna aınalmaq.
«Qurylys salasynda qordalanǵan máselelerdi batyl aıtyp, sala qyzmetkerleriniń muń-muqtajyn da ashyq kóteretin BAQ ókilderi. Sol úshin kásibı mereke qarsańynda osyndaı syı jasaýdy uıǵarǵan edik. Bul elordada ǵana emes, búkil Qazaqstan boıynsha jýrnalısterge arnalǵan jalǵyz alleıa. Kóshettermen birge suhbat oryndyqtaryn da sizderge arnap aldyrdyq. Bul bastamany «shallenge» retinde basqa óńirlerdiń qurylysshylaryna joldaımyz», - dedi ol.
BAQ ókilderi atynan sóz sóılegen shara qonaqtary qurylysshylar odaǵynyń kórsetken qurmetine alǵystaryn bildirdi.
