Elordada tuńǵysh ret bodıbıldıngten Ortalyq Azııa chempıonaty ótedi
NUR-SULTAN. QazAqparat - Chempıonat 23 mamyr kúni saǵat 11.00-de «Qazaqstan» kontsert zalynda bastalady, dep habarlaıdy QazAqparat tilshisi.
Bodıbıldıngten QR federatsııasynyń prezıdenti - Aleksandr Kolıýka elordada ótken baspasóz máslıhatynda atap ótkendeı, atalmysh sport túriniń Qazaqstanda damýyna joǵary baǵa berýge bolady. Ol óz sózinde IFBB ulttyq federatsııasynyń elimizdiń fıtnes ónerkásibindegi róline toqtalyp ótti.
«Qazirgi tańda fıtnes jáne bodıbıldıng qarqyndy damý ústinde. Sporttyń bul túri qarapaıym adamdardyń arasynda da tanymaldyqqa ıe boldy. IFBB federatsııasynyń basy mindeti bodıbıldıngten jarystarǵa qatysqysy keletin sportshylardy qoldap, sport túrin ári qaraı damytý. Osy turǵyda Qazaqstanda bodıbıldıngti damytý maqsatynda IFBB ulttyq federatsııasy Ulttyq Olımpıada komıteti men qatar Sportty damytý dırektsııasymen birlesip belsendi jumystar júrgizip keledi», - dedi ol.
IFBB Azııa qurlyqtyq federatsııasynyń prezıdenti Ochır Ganbaatar óz sózinde el sportshylarynyń álemdik arenalardaǵy jetistikterine toqtaldy.
«Biz Azııanyń 50 astam eliniń ulttyq federatsııalarymen jumys isteımiz. Bizdiń basty maqsatymyz - bodıbıldıngti óńirlerde sport túri retinde damytý. Osy jyly Ortalyq Azııa elderinde damytýdy qolǵa alyp, jeke Halyqaralyq týrnırlerdi ótkizbekpiz. Osyndaı baıraqty básekeler bodıbıldıng sport túrin damytýǵa úlken áserin tıgizip, jańa chempıondardy kóremiz degen oıdamyz», - dedi Ochır Ganbaatar.
Chempıonat 24-25 mamyr aralyǵynda Nur-Sultan qalasyndaǵy «Qazaqstan» kontsert zalynda ótedi. Klassıkalyq bodıbıldıng, bodıbıldıng, mens-fızık, výmens-fızık, fıtnes, eresekter men jasóspirimder arasynda bodıfıtnes jáne fıtnes-bıkını boıynsha júldeler sarapqa salynady. Jarys qorytyndysy boıynsha sportshylar Halyqaralyq dárejedegi ataqtarmen marapattalyp, olarǵa PRO kratalar tabystalady.
