Elordada tuńǵysh ret bessaıystan Álem kýbogi ótedi
ASTANA. QazAqparat - Astanada maýsym aıynyń 21-24 aralyǵynda bessaıystan Álem kýbogi ótedi, dep habarlaıdy QazAqparat tilshisi QR MSM Sport jáne dene shynyqtyrý isteri komıtetiniń baspasóz hatshysy Raýhan Toǵymbaevaǵa silteme jasap.
«20 jyldyq mereıtoıǵa oraı Astana bıyl zamanaýı bessaıys boıynsha «UIPM - 2018» Álem kýboginiń fınalyn ótkizetin bolady. 21-24 maýsym aralyǵynda ótetin Álem kýboginde semserlesýshiler «Saryarqa» velotreginiń bazasynda bas júldeni sarapqa salsa, «Barys arena» sport kesheniniń júzý basseıninde sýǵa júzýshiler ózara baq synaıdy. Al «Qazanat» atshabarynda atpen kedergilerden ótetin mamandar men lazerrandar (atý jáne júgirý) óziniń daǵdysyn pash etpek. Fınalǵa álemniń eń úzdik sportshylarynyń tizimine engen 36 er jáne 36 áıel sportshy kele jatyr. Sonymen birge, álemniń 25 elinen sheteldik meımandar keledi dep kútilýde», - deıdi Raýhan Toǵymbaeva.
Qazirgi ýaqytta Qazaqstan Respýblıkasy sportshylarynyń qorjynynda zamanaýı bessaıys boıynsha Azııa chempıonatynyń altyn medali, jastar arasyndaǵy Álem chempıonatynyń kúmis medali, UIPM Álem kýboginiń fınalynyń qola júldesi men Azııa chempıonatynyń kúmis medali bar. Aıta keterligi, Qazaqstan tarıhynda zamanaýı bessaıystan el abyroıyn qorǵaǵan myqty sportshylar barshylyq. Atap aıtqanda, 1996 jyly Atlantada ótken Olımpıada oıyndarynda Aleksandr Parygın Qazaqstannyń qorjynyna altyn medal salyp bergen bolatyn.
Qazirgi bessaıys - Olımpıada oıyndarynyń baǵdarlamasy úshin arnaıy ázirlengen sporttyń túri. Onyń negizin qalaýshy - Baron Per de Kýberten. 1913 jyly Kýbertenniń bastamasymen atalǵan sport túri Olımpıada oıyndaryna enizilgen.
Qazirgi bessaıys - sporttyq kópsaıystyń bir túri. Onyń baǵdarlamasyna sporttyń birneshe túrleri, atap aıtqanda atpen kedergilerden ótý (konkýr), semserlesý, pıstoletpen atý (25 metrden), erkin júzý (300 m), jeńil atletıkalyq kross (4000 m) enedi.
Qazaqstan sportshylarynyń qatarynan atalǵan saıysqa 4 sporty qatysqaly otyr. Olardyń úsheýi Álem kýbogine joldama alǵan. Tórtinshi joldama - Qazaqstan quramasyna bessaıys Astanada ótkizilip jatqandyqtan berilip otyr.
