Elordada tuńǵysh ret ústel tennısinen halyqaralyq deńgeıdegi Prezıdent kýbogy ótedi
ASTANA. KAZINFORM – Halyqaralyq týrnır aldynda baspasóz konferentsııasy uıymdastyryldy.
Beeline Arena alańyndaǵy aýqymdy jarysty QR Týrızm jáne sport mınıstrligi men QR Ústel tennısi federatsııasynyń qoldaýymen Nomad Table Tennis Academy ótkizedi.
NOMAD akademııasynyń dırektory Rýslan Jetýbaev bolashaqta Prezıdenttik kýbokty jyl saıyn ótetin dástúrli týrnırge aınaldyrý josparda bar ekenin aıtty.
– Atalmysh týrnır Qazaqstannyń brendine aınalyp, jyl saıyn jas talanttar men tanymal sheberler bas qosatyn alań bolǵanyn qalaımyz. Bul jaı ǵana jarys emes – ústel tennısin damytý men halyqaralyq sporttyq yntymaqtastyqty nyǵaıtýǵa jasalǵan qadam.
Jarysqa Qazaqstandy qosa alǵanda, 14 elden 300-den astam sportshy qatysady. Olardyń qatarynda Astana, Almaty, Shymkent, Qaraǵandy ókilderi, sondaı-aq Ońtústik Koreıa, Qytaı, Vengrııa, Mysyr, Malaızııa, Iran, Saýd Arabııasy jáne basqa da elderdiń tennısshileri bar. Sonymen qatar, týrnırge ITTF álemdik reıtınginiń top-100 qataryndaǵy oıynshylardyń qatysýy onyń halyqaralyq aýqymyn aıshyqtaıdy. Týrnırdiń jalpy júlde qory 115 000 AQSh dollaryn quraıdy, - dedi ol.
Kýboktyń basty erekshelikteriniń biri – álemdik ústel tennısiniń juldyzdary qatysatyn shoý-match. Jankúıerlerdi sport tarıhynda óshpes iz qaldyrǵan sheberlerdiń erekshe óneri kútip tur.
Tanymal sportshylar qatarynda:
– Sıýı Sın (Qytaı) – álemniń eks-birinshi raketkasy, tehnıkalyq sheberligimen jáne oıyn mánerimen mıllıondaǵan jankúıerdi tamsandyrǵan sportshy;
– Fan Bo (Qytaı) – álem chempıonatynyń kúmis júldegeri, kóz ilespes shabýyl stılimen tanymal sheber;
– Verner Shlager (Avstrııa) – 2003 jylǵy álem chempıony, Eýropa birinshilikteriniń birneshe dúrkin júldegeri;
– Djý Se Hýk (Koreıa) – 2003 jylǵy álem chempıonatynyń kúmis, 2011 jylǵy qola júldegeri, sondaı-aq 2012 jylǵy Olımpıada oıyndarynyń qatysýshysy.
– Ózderińizge málim, 2027 jyly Qazaqstan ústel tennısinen álem chempıonatyn qabyldaıdy. Sondyqtan mundaı deńgeıdegi iri jarysty ótkizý – elimiz úshin úlken mártebe. Bul is-shara álemdik dodaǵa daıyndyq retinde uıymdastyrylyp otyr. Jarysqa sheteldik myqty sportshylar keledi dep josparlanǵan. Sol sportshylardyń oıyndaryn jas jetkinshekterimiz tamashalap, úlken tájirıbe jınaıdy. Osy jarys arqyly el úzdikterin jáne ústel tennısiniń rezervin baıqaýǵa bolady, - dedi Qazaqstan Respýblıkasynyń Týrızm jáne sport mınıstriniń orynbasary Serik Jarasbaev.
Týrnır tórt jas sanaty boıynsha jeke jáne komandalyq esepte ótedi:
* U-11 – 2014 j.t. jáne odan kishiler;
* U-16 – 2009 j.t. jáne odan kishiler;
* Open 17+ – 2008 j.t. jáne odan úlkender;
* Team event – komandalyq razrıad.
Qazaqstannyń úzdik tennısshileri – Kırıll Gerasımenko, Alan Qurmanǵalıev, Aıdos Kenjeǵulov, Iskander Harkı, Záýresh Aqasheva, Sarvınoz Mırkadırova, Janerke Qoshqumbaeva jáne Anel Baqyt – Prezıdent kýboginde el namysyn qorǵaıdy.
Aıta keteıik, jarys 25–29 qazan aralyǵynda ótedi. Týrnırge kirý tegin.