Elordada túngi klýb eki aıda 4 márte karantındi buzǵan
Nur-Sultan qalalyq polıtsııa departamentiniń málimetinshe, karantın rejımin jıi buzatyn dámhana, meıramhana, karaoke, bar, saýda ortalyqtary erekshe nazar alynǵan. Polıtsııa qyzmetkerleri kásipkerlik sýbektilerine kúndelikti túngi jáne kúndizgi reıdter júrgizip, karantın rejimin buzýshylardy anyqtap, olardy jaýapkershilikke tartady.
Sonymen qatar kóńil kóterý oryndaryna baryp, olardyń ıelerine karantın sharalarynyń qoldanysta ekendigin eskertip otyrady.
«Nur-Sultan polıtsııasynyń qyzmetkerleri Taýarlar men kórsetiletin qyzmetterdiń sapasyn jáne qaýipsizdigin baqylaý basqarmasy ókilderimen birge bir táýliktiń ishinde 195 kásipkerlik nysanyn tekserip, karantın rejımin buzýdyń 65 faktisin anyqtady. Atap aıtqanda, Turan kóshesinde ornalasqan «ZOLOTO» meıramhanasynda saǵat 23:01 kezinde shamamen 100 qonaq bolǵan. Meıramhana áleýmettik araqashyqtyqty saqtamaı qyzmet kórsetken. Kórshi ústelderdiń shetki oryndary arasynda keminde 2 metr áleýmettik qashyqtyqty saqtaı otyryp jáne bir ústelge 4-6 adamnan aspaıtyndaı etip otyrǵyzyp, kúsheıtilgen sanıtarlyq-profılaktıkalyq is-sharalardy saqtaýmen, jumys kúnderi jáne demalys kúnderi saǵat 9:00-den 22:00-ge deıin jumys kestesin oryndamaǵan» dep atap ótedi departamentten.
Sonymen qatar, túngi saǵat 02:00 shamasynda 102 arnasyna Qonaev kóshesindegi úıdiń turǵyndarynan «CABERA» dámhana-barynda mýzyka daýysy qatty shyǵyp turǵany týraly shaǵym túsken. Shaqyrtý ornyna jedel attanǵan polıtsııa qyzmetkerleri dámhanada karantınge qaramastan mýzyka daýysyn qatty qoıyp, bılep júrgen adamdardy anyqtady.
«CABERA» dámhanasynyń klıentteri men ákimshiligi Esil aýdandyq polıtsııa basqarmasyna jetkizilip, 11 adam QR ÁQBtK 437-babymen ákimshilik jaýapkershilikke tartyldy. Al dámhana ákimshiligi shekteý sharalaryn buzǵany úshin osy kodekstiń 425-babymen jazalanady.
Vedomstvonyń atap ótýinshe, «CABERA» dámhana-bary shekteý sharalaryna qaramastan rejımdi jıi buzady.
Sońǵy 2 aıdyń ishinde dámhana 4 ret polıtsııa qyzmetkerleriniń nazaryna iligip, ákimshiligi men qojaıyny birneshe márte jaýapkershilikke tartylǵan.