Elordada túnde júrgen jasóspirimderdi anyqtaýǵa arnalǵan reıd ótti

– Bizde mundaı jedel is-sharalar jıi uıymdastyrylyp otyrady. Quqyqtyq tártipti saqtaý jedel is-sharasy aıasynda segiz kınorýmdy araladyq, – dedi Astana qalasy Saryarqa aýdany polıtsııa basqarmasynyń qoǵamdyq qaýipsizdikti qadaǵalaý jáne kámeletke tolmaǵandar isteri jónindegi ınspektory, polıtsııa leıtenanty Shuǵyla Amanqyzy.

Onyń sózinshe, kámeletke tolmaǵandarǵa túngi saǵat 22:00-den keıin kóńil kóterýge arnalǵan oıyn-saýyq nysandarynda júrýge bolmaıdy. Olardyń qataryna saýda ortalyqtary, kompıýter klýbtary, kınorýmder t.b. jatady. Al 23:00-den tańǵy saǵat 06:00-ge deıin zańdy ókilinsiz, tipti, kóshede júrýge de ruqsat etilmeıdi.

Eger jasóspirimder zańnamany buzsa, ata-analaryna ne zańdy ókilderine ákimshilik jaýapkershilik qarastyrylǵan.

– Birinshi ret ustalǵan jaǵdaıda QR Ákimshilik quqyqbuzýshylyq týraly kodeksiniń 442-babynyń, 2-bóligi boıynsha eskertý beriledi. Ekinshi ret ustalsa, ata-anasyna ne zańdy ókiline 15 137 teńge kóleminde ákimshilik aıyppul salynady. Sonda da bolǵan jaǵdaıdan sabaq almaı, túnde qala kezýin jalǵastyra berse, qaraýsyz, qadaǵalaýsyz júrgen jasóspirim retinde esepke alynady. Ustalǵan jasóspirimderdi zańdy ókili kelip alyp kete almasa, arnaıy beıimdeý ortalyǵyna ornalastyrylady, – dedi Shuǵyla Amanqyzy.

Polıtsııa leıtenantynyń aıtýynsha, birinshi ret ustalǵannan keıin jasóspirimderge eskertý berilip, profılaktıkalyq túsindirý jumystary júrgiziledi. Keıin sonyń arqasynda, ádette, olardyń kóbi túzelip, qateligin qaıtalamaıdy.

Al Saryarqa aýdany ákimdigi Іshki saıasat bóliminiń basshysy Damır Hısmatýllınnyń sózinshe, bul baǵyttaǵy jumystar úzdiksiz jalǵasyp keledi.

– Saryarqa aýdany ákimdiginiń Jastar saıasaty basqarmasy aýdandyq polıtsııa basqarmasynyń qyzmetkerlerimen birlesip, profılaktıkalyq reıd júrgizdi. Onyń maqsaty – zańdy ókilinsiz oıyn-saýyq oryndarynda jáne kóshede júrgen kámeletke tolmaǵan azamattardy anyqtaý. Jalpy, mundaı jumys kún saıyn júrgiziledi. Saryarqa aýdanynda jyl basynan beri 300-den astam ákimshilik hattama toltyryldy. Túnde júrgen jasóspirimderdiń zańdy ókilderi ákimshilik jaýapkershilikke tartyldy, – dedi ol.

Sonymen qatar, mamannyń málimdeýinshe, mundaı arnaıy reıdter apta saıyn ótedi. Negizinen, karaoke-barlar, túngi klýbtar, kınorýmder, kompıýter klýbtary t.b. oryndar tekseriledi.

Jasóspirimderdiń ata-analary men zańdy ókilderi ǵana emes, olardy túngi ýaqytta oıyn-saýyq ortalyǵyna kirgizgender de jaýapqa tartylady.

– Kámeletke tolmaǵandardy 22:00-den keıin qabyldaǵan bıznes sýbektileriniń ıeleri men jaýapty qyzmetkerlerine de ákimshilik jaýapkershilik qarastyrylǵan. Olarǵa QR Ákimshilik quqyqbuzýshylyq týraly kodeksiniń 132-baby boıynsha aıyppul salynady. Bıyl jyl basynan beri mundaı 7 fakti tirkeldi, – dedi Damır Hısmatýllın.

Sonymen birge, onyń sózinshe, mundaı reıdterde túrli jaǵdaılar bolady. Keı bozbalalar qashyp ketýge tyrysýy múmkin. Ondaı kezde «Polıtsııa qyzmetkeriniń zańdy talabyna baǵynbaý» baby boıynsha ákimshilik jaýapkershilik qarastyrylǵan.

Bul reıdke Astana qalasy ákimdigi Jastar saıasaty basqarmasyna qarasty «Astana jastary» jastar resýrstyq ortalyǵy da qoldaý bildirdi. Medıa jáne PR bóliminiń basshysy Anar Myrzabaeva izgi qoǵam qalyptastyrýǵa úles qosyp jatqanyn aıtady.

– Bizdiń ortalyq túnde júrgen jasóspirimderdiń ata-anasyn ne zańdy ókilderin jaýapqa tarta almaıdy. Biraq mundaı bastamalarǵa qoldaý bildiremiz. Maqsatymyz – profılaktıkalyq jumys júrgizý. Jas býyn zańǵa baǵynatyn, tártipti, tárbıeli azamat bolyp qalyptassyn degen nıetpen osyndaı is-sharalarǵa qatysamyz, – deıdi ol.

Anar Myrzabaevanyń aıtýynsha, jastar resýrstyq ortalyǵynyń «Zań men tártip» qaǵıdatyn iske asyrýǵa jáne quqyqtyq mádenıetti qalyptastyrýǵa arnalǵan budan da basqa kóptegen bastamasy bar.

– Mysaly, «Esirtkisiz elorda», «Stop, vandal» tárizdi jobalardy ataýǵa bolady. Byltyr biz atalǵan jumystar aıasynda ishki ister organdarynyń qyzmetkerlerimen birlesip, 10 tonna nasybaı tárkiledik, – dedi ol.

«Astana jastary» jastar resýrstyq ortalyǵynyń 25 qyzmetkerinen bólek, jobalaryna atsalysatyn 8 myń erikti bar. Solardyń 10-y atalǵan reıdke qatysyp, tolyqtaı basy-qasynda júrdi.

– Quqyqtyq mádenıetti damytý, quqyq buzýshylyqtyń aldyn alý, jasópirimderge oń, túzý joldy kórsetý maqsatynda jyl saıyn eki myńǵa jýyq is-shara ótkizemiz, – deıdi Anar Myrzabaeva.

Aıta keteıik, buǵan deıin kámeletke tolmaǵandar isteri jónindegi komıssııalardyń qyzmeti jańartylǵanyn jazǵanbyz.

Sonymen qatar, Aıda Balaeva kámeletke tolmaǵandar isteri jónindegi óńirlik komıssııalardyń quramyn jańartýdy tapsyrdy.