Elordada túnde qatynaıtyn avtobýstar paıda ákelmeıdi – park basshysy

ASTANA. KAZINFORM – Astanada maýsym aıynan beri túngi avtobýstar qatynap jatyr.

«Túnde qatynaıtyn avtobýstar paıda ákelmeıdi, bul áleýmettik joba. Bizdiń parkten túnde 3 baǵdar boıynsha 6 avtobýs júredi. Qoǵamdyq kólikter oń jáne sol jaǵalaý aralyǵynda qatynaıdy. Biz túngi avtobýstardyń baǵyty boıynsha taldaý jasap, halyqtyń suranysyn eskerdik», - dedi elordadaǵy №1 avtobýs parkiniń basqarma tóraǵasy Madııar Tuqpatov baspasóz týry barysynda.

Onyń aıtýynsha, túngi avtobýstar halyq jıi qatynaıtyn jáne tyǵyz ornalasqan baǵdarlar boıynsha júredi. 

Aıta keteıik, bıyl maýsymnan bastap elordada túngi avtobýstar qatynaı bastady. Olar saǵat 00:00-den bastap, tańǵy 06:00–ge deıin júredi.

Buǵan deıin park basshysy Astanada jolaýshylardyń 30-40 paıyzy aqy tólemeı júretinin aıtqan edi. 

Kúzde elordanyń birinshi avtobýs parki 100 kólikpen tolyǵady.