Elordada tún jarymynda massaj salony jumys istep turǵan
Nur-Sultan qalasy aýdandyq polıtsııa bólimine Telqońyr kóshesinde massaj salony bas sanıtar dáriger qaýlysynyń normalaryn buzyp, jumys istep jatqany týraly habarlama kelip tústi.
Túngi saǵat 02:00-de bul jerge polıtseıler, epıdemıolog mamandar jáne aýdandyq ákimdik ókilderi keldi.
«Tekserý kezinde ekiqabatty kottedj ishinde bodı massaj qyzmetin kórsetken «KAIF SPA» salony ornalasqany, sol kezde ishinde jeti er adamǵa qyzmet kórsetilgeni anyqtaldy. Tártip buzýshylarǵa qatysty túngi ýaqytta tynyshtyqty buzý, alkogoldi sýsyndardy ishý, kalıan shegý jáne basqa da zańbuzýshylyqtar úshin ákimshilik hattama toltyryldy» delingen habarlamada.
Budan bólek, tekseris kezinde sol jerde ornalasqan «Respublic» dámhanasy ákimshisiniń karantın shekteýlerine qaramastan klıentterdi saǵat 23:00-den keıin qabyldap jatqany belgili boldy.
Saýran kóshesinde ornalasqan retro-barǵa kelýshiler áleýmettik qashyqtyqty saqtamaǵan.
Barlyq jınalǵan materıaldar protsessýaldyq sheshim qabyldaý úshin taýarlar men kórsetiletin qyzmetterdiń sapasy men qaýipsizdigin baqylaý basqarmasyna jiberilgen.
Nur-Sultan qalasy polıtsııa departamenti azamattardy karantın sharalaryn buzǵandarǵa jaýapkershilik bar ekenin eskertip, sanıtarlyq normalardy saqtaýǵa shaqyrady.